மவுன்ட் சீயோன் சிபிஎஸ்இ பள்ளியில் புத்தகத் திருவிழா

புதுக்கோட்டை அருகே லெனாவிலக்கு மவுன்ட் சீயோன் மத்தியக் கல்வி பாடத் திட்டப் பள்ளியில் புத்தகத் திருவிழா திங்கள்கிழமை நடைபெற்றது.

புதுதில்லி ஸ்கோலஸ்டிக்ஸ் புத்தக நிலையத்தின் மதுரைக் கிளை சார்பில் அமைக்கப்பட்டிருந்த புத்தகத் திருவிழா கண்காட்சியை பள்ளி நிர்வாகி ஜே. ஜோனத்தன் தொடக்கி வைத்தார்.

இதில், அறிவுசார்ந்த புத்தகங்கள், விளையாட்டு, ஓவியம், ஆங்கில அகராதி, இலக்கியம், கதைகள், கணினி, அறிவியல், கணிதம், இயற்பியல், வேதியியல் உள்பட சுமார் 1500 தலைப்புகளில் சுமார் 10 ஆயிரம் புத்தகங்கள் காட்சிக்கு வைக்கப்பட்டிருந்தன.

செப். 11, 13 மற்றும் 14 ஆகிய 3 நாள்கள் நடைபெற்ற விற்பனைக் கண்காட்சியை பள்ளி மாணவ, மாணவிகள் அவர்களது பெற்றோர் என சுமார் 1000 பேர் பங்கேற்று தங்களுக்குத் தேவையான புத்தகங்களை வாங்கிச் சென்றனர்.

ஏற்பாடுகளை, பள்ளியின் இணை இயக்குநர் ஜே. ஏஞ்சலின், முதல்வர் ஜலசாகுமாரி, ஆசிரியர்கள் செய்திருந்தனர்.