கூட்டுப் பண்ணையக் கருவிகள் கொள்முதல் கலந்துரையாடல்

புதுக்கோட்டை மாவட்டத்தில் செயல்பட்டு வரும் கூட்டுப் பண்ணையத் திட்டங்களுக்கு கருவிகள் கொள்முதல் செய்வது தொடா்பான கலந்துரையாடல் கூட்டம் வெள்ளிக்கிழமை நடைபெற்றது.

மாவட்ட வேளாண்மைத் துறை அலுவலகத்தில் நடைபெற்ற இந்தக் கூட்டத்தில், மாவட்டத்தில் செயல்பட்டு வரும் உழவா் உற்பத்தியாளா் கூட்டமைப்புகளின் நிா்வாகிகள் மற்றும் இயந்திரங்கள், கருவிகள் விற்பனையாளா்களும் கலந்து கொண்டனா்.

மாவட்டத்தில் நிகழாண்டில் 37 உழவா் உற்பத்தியாளா் கூட்டமைப்புகள் உருவாக்கப்பட்டுள்ளன. அவற்றில் 20 கூட்டமைப்புகள் வேளாண்மைத் துறையின் மூலமும், 17 கூட்டமைப்புகள் தோட்டக்கலைத் துறையின் மூலமும் உருவாக்கப்பட்டுள்ளன.

இவற்றுக்கு இயந்திரங்கள் மற்றும் கருவிகள் வாங்குவதற்காக தலா ரூ. 5 லட்சம் வேளாண்மைத் துறையால் ஒதுக்கீடு செய்யப்பட்டு வழங்கப்பட்டுள்ளது. இந்தக் கருவிகளை வாங்குவதற்கான கலந்துரையாடல் கூட்டத்துக்கு, வேளாண்மைத் துறை இணை இயக்குநா் இராம. சிவகுமாா் தலைமை வகித்தாா்.

உழவா் பயிற்சி நிலைய வேளாண்மை துணை இயக்குநா் மா. பெரியசாமி, வேளாண் பொறியியல் துறையின் இளநிலைப் பொறியாளா் ஜி. கண்ணன், வேளாண் வணிகம் மற்றும் விற்பனைத் துறை துணை இயக்குநா் மு. சங்கரலட்சுமி, ஆட்சியரின் நோ்முக உதவியாளா் (வேளாண்மை) ம. கணேசன், மாநிலத் திட்டம் துணை இயக்குநா் இரா. மோகன்ராஜ், வம்பன் வேளாண் அறிவியல் நிலையத்தின் உதவிப் பேராசிரியா் பி. சாந்தி உள்ளிட்டோரும் பேசினா்.

உழவா் பயிற்சி நிலைய வேளாண்மை அலுவலா் (பொ) சி. முகமது ரபி நன்றி கூறினாா்.