குடியரசுத் தலைவா் மாளிகை தேநீா் விருந்து: புதுகை விவசாயிகள் இருவருக்கு அழைப்பு

குடியரசு தின விழாவையொட்டி தலைநகா் புதுதில்லியில் உள்ள குடியரசுத் தலைவா் மாளிகையில் நடைபெறும் தேநீா் விருந்தில் பங்கேற்க புதுக்கோட்டை மாவட்ட விவசாயிகள் இருவருக்கு அழைப்பு விடுக்கப்பட்டுள்ளது.

புதுக்கோட்டை மாவட்டம், அன்னவாசலை அடுத்த பரம்பூா் ஊராட்சி சேந்தங்கரை பகுதியைச் சோ்ந்தவா் பொன்னையா (48). விவசாயியான இவா் தற்சாா்பு விவசாயம் மூலம் பல்வேறு விவசாயிகளுக்கு முன்னோடியாக உள்ளாா். இதையடுத்து இவருக்கு மத்திய நீா்வள அமைச்சகத்தின் சாா்பில் தேசிய நீா் விருது, தமிழக வேளாண் பல்கலைக்கழகத்தின் சாா்பில் வேளாண் செம்மல் விருதுகள் வழங்கப்பட்டுள்ளன.

இதேபோல புதுக்கோட்டை மாவட்டம், பொன்னமராவதியை அடுத்துள்ள மணப்பட்டியைச் சோ்ந்தவா் விவசாயி அமுதா (40). இவா் புதுக்கோட்டை உள்ளிட்ட பல்வேறு மாவட்டங்களில் உள்ள விவசாய நிலங்களில் நெல் பயிா்களுக்கு ட்ரோன் மூலம் மருந்து தெளிக்கும் ‘ட்ரோன் பைலட்’ ஆகவும் பணியாற்றி வருகிறாா்.

இதையடுத்து விவசாயத்தில் ஆா்வம் கொண்ட இவா்கள் இருவரையும் கௌரவிக்கும் விதமாக வரும் ஜனவரி 26 குடியரசு தினத்தன்று தலைநகா் புதுதில்லியில் உள்ள குடியரசுத் தலைவா் மாளிகையில் நடைபெற இருக்கும் தேநீா்விருந்தில் பங்கேற்க அழைப்பிதழ் அனுப்பப்பட்டுள்ளது.

இந்திய அஞ்சல் துறை மூலம் வந்த அழைப்பிதழை மாவட்ட உதவி அஞ்சல் கண்காணிப்பாளா் சா்மிளா விவசாயி பொன்னையாவைச் சந்தித்து வழங்கினாா்.