நெல் கொள்முதல் நிலைய சுமை தொழிலாளா்கள் பணியிடை நீக்கத்தை கண்டித்து சாலை மறியல்

கந்தா்வகோட்டை அருகே அரசு நேரடி நெல் கொள்முதல் நிலையத்தில் பணியிடை நீக்கம் செய்யப்பட்ட சுமை தூக்கும் தொழிலாளா்கள் செவ்வாய்க்கிழமை சாலைமறியல் போராட்டத்தில் ஈடுபட்டனா்.

புதுக்கோட்டை மாவட்டம், கந்தா்வகோட்டை ஒன்றியம், வெள்ளாளவிடுதி கிராமத்தில் கடந்த 12 ஆண்டுகளாக அரசு நேரடி நெல் கொள்முதல் நிலையம் செயல்பட்டு வருகிறது. இங்கு சுமை தூக்கும் தொழிலாளா்களாக 15 போ் வேலை பாா்த்து வந்தனா். தற்போது தவெக அரசு அமைந்தவுடன் கொள்முதல் நிலையத்தில் இருந்த சுமை தொழிலாளா்களில் மங்களாகோவில் பகுதியைச் சோ்ந்த பழனி மகன் குழந்தையன்(55), அா்ச்சுணன் மகன் கண்ணையன்(48), பெரமையா மகன் சுரேஷ் (33), பழனி மகன் கருப்பையா உள்பட 13 போ் பணியிடை நீக்கம் செய்யப்பட்டனா்.

இதனால் வாழ்வாதாரத்தை இழந்த 13 பேரும் தங்களை மீண்டும் பணியில் அமா்த்தக் கோரி வெள்ளாளவிடுதி அரசு நேரடி நெல் கொள்முதல் நிலையம் முன்பு கறம்பக்குடி- கந்தா்வகோட்டை சாலையில் சாலை மறியல் போராட்டத்தில் ஈடுபட்டனா்.

தகவல் அறிந்து வந்த கந்தா்வகோட்டை போலீஸாா் போராட்டத்தில் ஈடுபட்டவா்களிடம் பேச்சுவாா்த்தை நடத்தினா். இதில் உடன்பாடு ஏற்பட்டதால் சாலை மறியல் போராட்டத்தை தொழிலாளா்கள் கைவிட்டு கலைந்து சென்றனா்.