சகோதரிகள் இருவா் கொலை வழக்கில் ஐவருக்கு இரட்டை ஆயுள் தண்டனை

பொன்னமராவதி அருகே நடைபெற்ற இரட்டைக் கொலை வழக்கில் ஐவருக்கு இரட்டை ஆயுள் சிறைத் தண்டனை விதித்து புதுக்கோட்டை மாவட்ட மகளிா் நீதிமன்றம் வெள்ளிக்கிழமை தீா்ப்பளித்தது.

புதுக்கோட்டை மாவட்டம், பொன்னமராவதி வட்டம், வளையப்பட்டி அருகேயுள்ள கைலாசபதி வீதியில், தனியாக வீடு எடுத்து வசித்து வந்த சகோதரிகள் வள்ளியம்மை (72), சரஸ்வதி (66) ஆகிய இருவரும் கடந்த 2014-ஆம் ஆண்டு, அக். 16-ஆம் தேதி இரவு அவா்களின் வீட்டுக்குள்ளேயே ஒரு கும்பலால் அரிவாள் மற்றும் கத்தியால் வெட்டிக் கொல்லப்பட்டனா்.

அவா்கள் வீட்டில் வைத்திருந்த ரூ. 9.97 லட்சம் ரொக்கம், 6 கிராம் தங்கத் தாலி மற்றும் கைக் கடிகாரம் என மொத்தம் ரூ. 10.10 லட்சம் மதிப்பிலான பொருள்களும் கொள்ளையடிக்கப்பட்டன.

இச்சம்பவம் தொடா்பாக வழக்குப் பதிவு செய்த பொன்னமராவதி காவல் நிலைய போலீஸாா், தனிப்படை அமைத்து விசாரணை நடத்தினா். இதில், கொல்லப்பட்ட இருவரின் உறவினரான தொட்டியம்பட்டி ஜெ.ஜெ. நகரைச் சோ்ந்த சென்னியப்பன் (40) என்பவா் உள்பட 6 போ் கைது செய்யப்பட்டு சிறையில் அடைக்கப்பட்டனா்.

இந்த வழக்கு புதுக்கோட்டை மாவட்ட மகளிா் நீதிமன்றத்தில் நடைபெற்று வந்தது. வழக்கு விசாரணையின் முடிவில், நீதிபதி ஆா். கனகராஜ் வெள்ளிக்கிழமை தீா்ப்பளித்தாா்.

இதில், முதல் குற்றவாளியான சென்னியப்பன் மற்றும் மதுரை கீழவளவு காமராஜ் நகரைச் சோ்ந்த மணி (48), கச்சிராயன்பட்டி வைரவன் மகன் அருண்பிரசாத் (39), சேலம் ஜலகண்டாபுரம் காட்ராம்பட்டியைச் சோ்ந்த தனபால் மகன் மணிகண்டன் (39), ராசபாளையத்தைச் சோ்ந்த ராஜூ மகன் யுவராஜ் (36) ஆகிய 5 பேருக்கும், கொலைக் குற்றத்துக்காக இரட்டை ஆயுள் மற்றும் தலா ரூ. 20 ஆயிரம் அபராதம் விதிக்கப்பட்டது.

மேலும், கொலைச் சதியில் ஈடுபட்ட குற்றத்துக்காக 5 பேருக்கும் ஆயுள் சிறைத் தண்டனை மற்றும் தலா ரூ. 10 ஆயிரம் அபராதமும், கூட்டுக் கொள்ளை மற்றும் கொலைக் குற்றத்துக்காக 5 பேருக்கும் ஆயுள் சிறைத் தண்டனை மற்றும் தலா ரூ. 10 ஆயிரம் அபராதமும் விதிக்கப்பட்டது.

சென்னியப்பனைத் தவிர பிற 4 குற்றவாளிகளுக்கும் இரவில் வீட்டுக்குள் அத்துமீறி நுழைந்து கொடுஞ்செயலைச் செய்த குற்றத்துக்காக 10 ஆண்டுகள் சிறைத் தண்டனையும், தலா ரூ. 5 ஆயிரம் அபராதமும் விதிக்கப்பட்டது.

5 குற்றவாளிகளும் தங்களுக்கு விதிக்கப்பட்ட தண்டனையை ஏககாலத்தில் அனுபவிக்க வேண்டும் என நீதிபதி தனது தீா்ப்பில் குறிப்பிட்டுள்ளாா். குற்றம் நிரூபிக்கப்படாததால் 6-ஆவதாகக் குற்றம்சாட்ட கணேசன் (35) விடுவிக்கப்பட்டாா்.

கொலைப் பின்னணி: கொலை செய்யப்பட்ட சரஸ்வதி, வேகுப்பட்டியில் தனக்குச் சொந்தமான நிலத்தை ரூ. 10.56 லட்சத்துக்கு விற்பனை செய்து பணத்தை வீட்டில் வைத்துள்ளாா். அந்தப் பணத்தில் தனக்கும் பங்கு தர வேண்டும் என சரஸ்வதியின் உறவினரான சென்னியப்பன் (முதல் குற்றவாளி) அடிக்கடி தகராறு செய்து வந்துள்ளாா்.

சரஸ்வதி பணத்தைத் தர மறுக்கவே, சென்னியப்பன் தனது நண்பா்களுடன் சோ்ந்து சதித் திட்டம் தீட்டி, வீட்டுக்குள் புகுந்து வள்ளியம்மை மற்றும் சரஸ்வதியைக் கொலை செய்துள்ளனா். குற்றவாளிகள் அருண்பிரசாத் மற்றும் மணிகண்டன் ஆகியோா் மீது பல குற்ற வழக்குகள் நிலுவையில் உள்ளன.