திருவலஞ்சுழி  சுவேத விநாயகர் கோயிலில் விநாயகர் சதுர்த்தி விழா கொடியேற்றம்

கும்பகோணம் அருகே திருவலஞ்சுழி சுவேத விநாயகர் கோயிலில் விநாயகர் சதுர்த்தி விழா புதன்கிழமை கொடியேற்றத்துடன் தொடங்கியது.
ஒவ்வொரு ஆண்டும் திருவலஞ்சுழி சுவேத விநாயகர் கோயிலில் விநாயகர் சதுர்த்தி விழா சிறப்பாக கொண்டாடப்படும். அதன்படி, நிகழாண்டு விழா கடந்த 4 ஆம் தேதி விக்னேஸ்வர பூஜை நடைபெற்றது. இதை தொடர்ந்து வாஸ்துசாந்தி நடைபெற்றது. இதையடுத்து புதன்கிழமை காலையில் கொடியேற்றத்துடன் விநாயகர் சதுர்த்தி விழா தொடங்கியது. தொடர்ந்து யாகசாலை பூஜை,  ஹோமங்கள் நடைபெற்றன. இதில் ஏராளமான பக்தர்கள் பங்கேற்று சுவாமி தரிசனம் செய்தனர். மாலை கஜமுகாசுர வாகனத்தில் திருவீதியுலா நடைபெற்றது. 
செப்டம்பர் 6 ஆம் தேதி காலையில் பல்லக்கு திருவீதியுலாவும்,  மாலையில் காமதேனு வாகனத்தில் திருவீதியுலாவும் நடைபெறுகிறது. வரும் 13 ஆம் தேதி விநாயகர் சதுர்த்தி விழாவை முன்னிட்டு காலை தேவேந்திர பூஜை நடக்கிறது. தொடர்ந்து திருத்தேர் வடம்பிடித்தல் நிகழ்ச்சியும்,  மாலை மூஷிக வாகனத்தில் சுவாமி வீதியுலாவும் நடைபெற உள்ளது. இதையடுத்து வரும் 14 ஆம் தேதி கொடியிறக்க நிகழ்ச்சி நடைபெறுகிறது. மறுநாள் 15 ஆம் தேதி சுத்தாபிஷேகம் நடைபெற உள்ளது. 
கோயிலில் தொடர்ந்து 12 நாள்கள் நடைபெறும் விநாயகர் சதுர்த்தி விழாவில் காலை, மாலை ஆகிய இருவேளைகளிலும் வேதபாராயணம்,  திருமுறை பாராயணம், சிறப்பு நாகசுர இன்னிசை நிகழ்ச்சி ஆகியவை நடைபெறுகிறது. அதேபோல,  காலை வேளையில் பல்லக்கு திருவீதியுலாவும், மாலை வேளையில் பல்வேறு வாகனங்களில் சுவாமி திருவீதியுலாவும் நடைபெறுகிறது.