கும்பகோணத்தில் ஒன்றியக் குழுத் தலைவரை கண்டித்து உறுப்பினா்கள் வெளிநடப்பு

கும்பகோணத்தில் வியாழக்கிழமை நடைபெற்ற ஒன்றியக் குழுக் கூட்டத்தில் தரையில் அமர வைக்கப்பட்டதைக் கண்டித்து திமுக, அதிமுகவை சோ்ந்த உறுப்பினா்கள் வெளிநடப்பு செய்தனா்.

ஒன்றியக் குழுத் தலைவா் காயத்ரிஅசோக்குமாா் தலைமையில் நடைபெற்ற இக்கூட்டத்தில், ‘கூட்டம் நடைபெறும் நாளை முன்கூட்டியே தெரியப்படுத்த வேண்டும். கூட்டம் நடைபெறும் நாளில் மட்டுமே உறுப்பினா்களிடம் தீா்மானப் பொருள்கள் தொடா்பாக கையொப்பம் பெற வேண்டும். முன்கூட்டியே கையொப்பம் பெறக் கூடாது. வழக்கம்போல உறுப்பினா்கள் அமருவதற்கு நாற்காலிகள், மேஜைகள் வழங்க வேண்டும். தரையில் அமர வைக்கக் கூடாது. ஊராட்சி ஒன்றியத்துக்குச் சொந்தமான கட்டடத்தை வட்டாரப் போக்குவரத்து அலுவலகத்துக்கு எதன் அடிப்படையில் தாரை வாா்க்கப்பட்டது எனக் கூறி, இதைக் கண்டித்து வெளிநடப்பு செய்தனா்.

இதுகுறித்து செய்தியாளா்களிடம் ஒன்றியக் குழுத் தலைவா் காயத்ரிஅசோக்குமாா் தெரிவித்தது:

தற்போது கூட்டம் நடத்தப்பட்டு 21 தீா்மானங்கள் நிறைவேற்றப்பட்டன. ஒன்றியக் குழுக் கூட்ட அரங்கில் பா்னிச்சா்கள் இல்லை என முன்பு கூறினோம். பா்னிச்சா்கள் வாங்க தீா்மானம் கொண்டு வரப்பட்டது. ஆனால், அலுவலா்கள் பா்னிச்சா்களை வாங்கித் தரவில்லை. இதைச் சுட்டிக்காட்டவே தற்போது நடைபெற்ற கூட்டம் தரையில் ஜமுக்காளம் விரித்து நடைபெற்றது என்றாா் அவா்.

திமுக மூத்த உறுப்பினா் கோமதிசண்முகம் கூறுகையில், தலைவா் இருக்கை அருகே துணைத் தலைவருக்கு இருக்கை வழங்க வேண்டும். இதைத் தவிா்க்க வேண்டும் என்பதற்காக யாருக்கும் இருக்கைகள் வழங்காமல், தரையில் அமர வைத்துள்ளனா். உறுப்பினா்களிடம் கூட்டம் தொடா்பாக முன்கூட்டியே கையொப்பம் வாங்குகின்றனா். ஆறு மாதங்களாக கூட்டத்தில் கலந்து கொள்ளும் உறுப்பினா்களுக்குப் பங்கேற்பு பயணப்படி வழங்குவதில்லை. ஊராட்சி ஒன்றியக்குழுத் தலைவரின் செயல்பாடுகள் தன்னிச்சையாக உள்ளது என்றாா் அவா்.