வீடுகளில் திருடி வந்த இருவர் கைது: 58  சவரன் நகை மீட்பு

திருச்சி மாவட்டம், முசிறி சுற்று வட்டாரப் பகுதிகளில் உள்ள வீடுகளில் திருடிய இருவரை முசிறி போலீஸார் புதன்கிழமை கைது செய்தனர். மேலும் அவர்களிடம் இருந்து 58 சவரன் தங்க நகையினை மீட்டனர்.
முசிறி அருகே வீரமணிப்பட்டியில் பார்த்தீபன் என்பவர் வீட்டில் கடந்த ஜூன் 1 ஆம் தேதி பூட்டிருந்த வீட்டில்  திருடிக்கொண்டிருந்த பெண்ணை அப்பகுதி மக்கள் பிடித்து முசிறி போலீஸாரிடம் ஒப்படைத்தனர். விசாரணையில், அந்தப் பெண் தூத்துக்குடி மாவட்டம் காயல்பட்டினம் பகுதியைச் சேர்ந்த லதா (39), திருச்சியைச் சேர்ந்த ரெங்கநாதன் (31) என்ற இளைஞருடன் முசிறி பகுதியில் பல்வேறு வீடுகளில் பூட்டை உடைத்து நகை மற்றும் பணத்தைத் திருடி வந்தது தெரிய வந்தது. லதாவின் செல்லிடப்பேசி மூலம் தொடர்பு கொண்டு ரெங்கநாதனை குளித்தலை பகுதியில் போலீஸார் பிடித்தனர். அவர்களை முசிறி குற்றவியல் நீதிமன்றத்தில் ஆஜர்படுத்தி திருச்சி மத்திய சிறையில் அடைத்தனர். இதனையடுத்து அவர்களிடம் இருந்து 58 சவரன் நகையை போலீஸார் மீட்டனர்.