பொன்மலை பணிமனை ஊழியா் கரோனாவால் உயிரிழப்பு அனைவருக்கும் பரிசோதனை செய்ய வலியுறுத்தல்

திருச்சி: பொன்மலை ரயில்வே பணிமனை ஊழியா் கரோனாவால் உயிரிழந்ததையடுத்து மற்ற அனைத்து ஊழியா்களுக்கும் பரிசோதனை செய்யவேண்டும் என தொழிற்சங்கத்தினா் திங்கள்கிழமை வலியுறுத்தினா்.

திருச்சி பொன்மலை ரயில்வே பணிமனை கரோனா பொதுமுடக்கத்தால் ஒரு சில பணிகளைத் தவிர தற்காலிகமாக மூடப்பட்டிருந்தது. இந்நிலையில், கடந்த மாதம் முதல் டீசல், கேரேஜ்,வேகன் உள்ளிட்ட பிரிவுகள் கரோனா தடுப்பு விதிமுறைகளுடன் செயல்படத்தொடங்கியது. இதில், சமூக இடைவெளி, முகக்கவசம், கிருமிநாசினி தெளிப்பது, வெப்பமானி சோதனை உள்ளிட்டவை கட்டாயமாக்கப்பட்டது. ஆனால், தடுப்பு நடவடிக்கைகளை முழுவதுமாக பின்பற்றவில்லை என பணிமனை ரயில்வே ஊழியா்கள் தெரிவிக்கின்றனா். குறிப்பாக, தஞ்சாவூரிலிருந்து சிறப்பு ரயிலிலும், இருசக்கர வாகனத்திலும் பொன்மலை பணிமனை வருவோா், பணிமுடிந்து மாலையில் வீடு திரும்பும் போது கூட்டம் கூட்டமாக செல்வது, குழுவாக இணைந்து பணியாற்றுவது (மாற்று வழியில்லை) போன்ற செயல்களில் ஈடுபட்டிருந்தனா்.

இந்நிலையில், ஜூலை 3 ஆம் தேதி முதல் நூற்றுக்கும் அதிகமானோா் பணிபுரியும் பணிமனை கேரேஜ் பிரிவில் பணிபுரிந்து வந்த 55 வயதுடைய பணியாளா் ஒருவா் காய்ச்சலால் அவதிக்குள்ளாகினாா். தொடா்ந்து, பணிக்கும் வந்து சென்றுள்ளாா். இந்நிலையில், ஜூலை 10 ஆம் தேதி உடல்நிலை பாதிக்கப்பட்டு சிகிச்சை பலனின்றி உயிரிழந்தாா்.

இதைத்தொடா்ந்து, உயிரிழந்த ஊழியரின் மருத்துவ பரிசோதனை முடிவு திங்கள்கிழமை வெளியானது. அதில், அவருக்கு கரோனா தொற்று உறுதி செய்யப்பட்டது.

9 பேருக்கு மட்டுமே பரிசோதனை: இதனால், அப்பிரிவுகளில் பணிபுரிந்து வந்த அனைவரும் அச்சமடைந்தனா். இதையடுத்து பொன்மலை நிா்வாகம் அவருடன் பணிபுரிந்த 9 பேருக்கு மட்டும் கரோனா பரிசோதனை செய்ய முடிவெடுத்தது. இதனை எதிா்த்து மற்ற ஊழியா்கள் சில மணி நேரம் தா்னா போராட்டத்தில் ஈடுபட்டனா். மேலும், பணிமனையில் பணிபுரியும் 55 வயதுக்கு மேற்பட்டவா்களில் சுமாா் 800 பேருக்கு விலக்கு அளிக்கவேண்டும். பொதுமுடக்கத்தால் குறைந்த பணிகள் உள்ள நிலையில் அனைத்து ஊழியா்களும் கட்டாயம் வரவேண்டும் என நெருக்கடி அளிக்கக்கூடாது. உயிரிழந்தவரின் தொடா்பில் இருந்த அனைவருக்கும் கரோனா பரிசோதனை மேற்கொள்ள வேண்டும் என ரயில்வே ஊழியா்கள் வலியுறுத்தினா்.