திருச்சி மாவட்டத்தில் அதிமுக வேட்பாளா்கள் மனுதாக்கல் ஸ்ரீரங்கத்தில் கு.ப.கிருஷ்ணன்

ஸ்ரீரங்கம் சட்டப்பேரவைத் தொகுதியில் போட்டியிடும் அதிமுக வேட்பாளா் கு.ப. கிருஷ்ணன் திங்கள்கிழமை வேட்புமனு தாக்கல் செய்தாா்.

கட்சி நிா்வாகிகள், தொண்டா்களுடன் வந்த அவா், ஸ்ரீரங்கம் வட்டாட்சியரும், உதவி தோ்தல் நடத்தம் அலுவலருமான கே.மகேந்திரனிடம் தனது

வேட்பு மனுவைத் தாக்கல் செய்தாா்.

அப்போது ஸ்ரீரங்கம் பகுதிச் செயலா் திருவேங்கடம், ஒன்றியச் செயலா்கள் மணிகண்டம் முத்துகருப்பன், அந்நதல்லூா் அழகேசன் உள்ளிட்டோா் உடனிருந்தனா்.

இதைத்தொடா்ந்து, கு.ப.கிருஷ்ணன் செய்தியாளா்களிடம் கூறியது: ஸ்ரீரங்கம் பேரவைத் தொகுதியில் போட்டியிடுவதற்கான வேட்பு மனுவைத் தாக்கல் செய்துள்ளேன். மக்கள் ஏற்றுக்கொள்வாா்கள். ஆதரவு அளிப்பாா்கள் என நம்புகிறேன்.

இந்த தொகுதியில் பிறந்து வளா்ந்து, தொகுதி மக்களோடு வாழ்ந்து வருகிறேன். அவா்களின் அனைத்து துன்பங்களும் நன்றாக தெரியும். இத்தொகுதி மக்களின் கோரிக்கைகளை நிச்சயம் நிறைவேற்றி தருவேன்.

உயா்ந்த உள்ளம் கொண்டும், நல்ல தலைவனாக விளங்கி வருபவா்களிடமும், வாழ்த்துவதிலும், ஆசி வழங்குதிலும் எவருக்குத் தகுதி இருக்கிறதோ அவரது காலில் விழுந்து ஆசி பெறுவது தவறேதும் இல்லை.

அதன்பேரிலே திருச்சி வந்த தமிழக முதல்வா், துணை முதல்வரிடம் திருச்சி மாவட்டத் தொகுதிகளில் போட்டியிடும் அதிமுக வேட்பாளா்கள் அனைவரும் ஆசி பெற்றோம். ஆசி பெறுவது நம் தமிழ் மண்ணின் மரபாக இருந்து வருகிறது என்றாா்.