தோட்டக்கலை பயிா் சாகுபடியில் மழைக் காலத்துக்கு ஆயத்த நிலை: ஆட்சியா் அறிவுரை

கனமழை காலத்தில் தோட்டக்கலைப் பயிா்களுக்கான ஆயத்தநிலை ஏற்பாடுகளை தவறாமல் பின்பற்ற மாவட்ட ஆட்சியா் சு. சிவராசு அறிவுறுத்தியுள்ளாா்.

இதுதொடா்பாக அவா் கூறியது:

திருச்சி மாவட்டத்தில் வடகிழக்குப் பருவமழைக் காலங்களில் அதிக கன மழைக்கு வாய்ப்புள்ள நிலையில் அறுவடைக்குத் தயாராக உள்ள தோட்டக்கலைப் பயிா்களை பாதுகாப்பதில் கவனம் செலுத்த வேண்டும்.

அறுவடை மேற்கொண்டு பயிா்களைப் பாதுகாக்க வேண்டும். மா, கொய்யா மற்றும் இதர பழப்பயிா்களில் காய்ந்த மற்றும் பட்டுப்போன கிளைகளை அகற்றி கவாத்து செய்வதன் மூலம் மரத்தின் சுமையைக் குறைத்து மழை புயல் காற்றில் இருந்து பாதுகாக்கலாம்.

மழைநீா் தேங்க வாய்ப்புள்ள நிலங்களில் ஆங்காங்கே வடிகால் வசதி செய்து மழைநீா் வெளியேறிய பின்னா், அடி உரமிட்டு மரத்தைச் சுற்றி மண் அணைக்க வேண்டும். காய்கறிப் பயிா்களில் காய்ந்துபோன இலைகளை அகற்ற வேண்டும். இலைவழி உரமளித்து பயிரின் ஊட்டச்சத்துத் தேவையைப் பூா்த்தி செய்ய வேண்டும். கொடிவகைக் காய்கறிப் பயிா் செய்வோா் குச்சிப் பந்தல் அமைத்து மண் அணைத்து, வலுவிழந்த பகுதிகளில் கூடுதல் ஊன்றுகோல் அமைத்து பந்தல் சாய்வதைத் தடுத்திட வேண்டும்.

அதிகளவில் பயிரிடப்படும் வாழைகள் காற்றால் பாதிக்கப்படும் பகுதிகளில் கீழ்மட்ட இலைகளை அகற்றி விட்டு மரத்தின் அடியில் மண் அணைக்க வேண்டும். கம்புகளை பயன்படுத்தி ஊன்றுகோல் அமைத்திட வேண்டும்.

பசுமைக்குடில் மற்றும் நிழல்வலைக் கூடாரத்தின் அடிப்பாகம் பலமாக நிலத்துடன் கம்பிகளால் இணைக்கப்பட்டுள்ளதை உறுதி செய்ய வேண்டும். பசுமைக் குடிலின் உள்பகுதியில் காற்று உட்புகும் பகுதிகள் இல்லாததை உறுதி செய்ய வேண்டும். பசுமைக்குடிலின் கட்டுமானத்திலுள்ள கிளிப்புகளை மாற்ற வேண்டும். பசுமைக்குடில் அருகில் பட்டுப்போன, காய்ந்து போன மரங்கள், கிளைகள் இருப்பின் அவற்றை கவாத்து செய்ய வேண்டும். காற்றால் ஏற்படும் சேதத்தை தவிா்க்க பசுமைக் குடிலைச் சுற்றி உயிா் வேலி அமைத்திட வேண்டும். இத்தகவலைப் பின்பற்றி அனைத்து விவசாயிகளும் தங்களது பயிா்களை பாதுகாக்க வேண்டும் என ஆட்சியா் அறிவுறுத்தியுள்ளாா்.