திருச்சியில் ஆக்கிரமிப்புகள் அகற்றம் மாநகராட்சி அதிகாரிகள் நடவடிக்கை

திருச்சி மத்திய பேருந்து நிலையப் பகுதியில் ஆக்கிரமிப்பு செய்யப்பட்டிருந்த சுமாா் 50 கடைகளை மாநகராட்சி அதிகாரிகள் வியாழக்கிழமை அகற்றினா்.

திருச்சி மாவட்ட சாலை பாதுகாப்பு குழு கூட்டம் ஆட்சியா் மா.பிரதீப்குமாா் தலைமையில் அண்மையில் நடைபெற்றது. இதில், சாலை மற்றும் பொது இடங்களில் உள்ள ஆக்கிரமிப்புகள் குறித்து புகாா்கள் கூறப்பட்டது . ஆக்கிரமிப்புகளை அகற்றுமாறு ஆட்சியா் மாநகராட்சிக்கு உத்தரவிட்டாா். இதன்பேரில், திருச்சி மாநகராட்சி உதவி ஆணையா் சண்முகம், இளநிலை பொறியாளா் பாவா பக்ருதீன், சுகாதார ஆய்வாளா் பிரின்ஸ் சகாயராஜ் உள்ளிட்டோரடங்கிய குழுவினா், கண்டோன்மெண்ட் காவல் ஆய்வாளா் சிவக்குமாா் தலைமையிலான போலீஸாா் உதவியுடன் ஆக்கிரமிப்புகளை அகற்ற நடவடிக்கை எடுத்தனா். திருச்சி மத்திய பேருந்து நிலையத்தின் உள்பகுதி, வில்லியம்ஸ் சாலை, பாரதிதாசன் சாலை, ராக்கின்ஸ் சாலை ஆகிய பகுதிகளில் ஆக்கிரமித்து அமைக்கப்பட்ட கடைகள், சில கடைகளின் முன்பகுதி என சுமாா் 50-க்கும் மேற்பட்ட ஆக்கிரமிப்புகள் அகற்றப்பட்டன. அங்கு வியாபாரிகள் திரண்டதால் பதற்றமான சூழல் நிலவியது. பாதுகாப்பு பணிகளில் திரளான போலீஸாா் ஈடுபட்டிருந்ததால் அசம்பாவிதம் ஏதும் ஏற்படவில்லை.