வருண் சக்ரவர்த்தி மீண்டு வருவாரா? கேகேஆர் தலைமைப் பயிற்சியாளர் பதில்!

கொல்கத்தா நைட் ரைடர்ஸ் அணியின் தலைமைப் பயிற்சியாளர், “வருண் சக்கரவர்த்தி மீண்டு வருவார்; அதில் சந்தேகமே இல்லை” எனக் கூறியுள்ளார்.

ஐபிஎல் 2026 சீசனின் முதல் போட்டியில் கேகேஆர் அணி மும்பை இந்தியன்ஸ் அணியிடம் விளையாடியது. முதலில் விளையாடிய கேகேஆர் 220/4 ரன்கள் குவிக்க, மும்பை 19.1 ஓவர்களில் 224/4 ரன்கள் எடுத்து வென்றது.

வானகடேவில் நடைபெற்ற இந்தப் போட்டியில் வருண் சக்ரவர்த்தி மோசமாக பந்துவீசினார். 4 ஓவர்களில் விக்கெட் ஏதும் எடுக்காமல் 48 ரன்களை வழங்கினார். ரோஹித் சர்மா, ரியான் ரிக்கல்டன் சிறப்பாக விளையாடினார்கள்.

இந்நிலையில், கேகேஆர் அணியின் தலைமைப் பயிற்சியாளர் அபிஷேக் சர்மா கூறியிருப்பதாவது:

கடந்த ஆண்டுகளில் வருண் பல இன்னல்களைச் சந்தித்துள்ளார். அணியாக, பயிற்சியாளராக நாங்கள் அவரை நம்புகிறோம். அவரிடம் எந்தப் பிரச்னையும் இல்லை. ஆனால், சில அணிகள் அவரது ஓவரை நன்றாக விளையாடிவிட்டது.

அதற்காக, வருண் திரும்ப வரவே மாட்டார் எனக் கூற முடியாது. இதற்கு முன்பாக வருண் சந்தித்தது போலவே, இதுவும் ஒரு சவால்தான். உலகத்தில் உள்ள அனைத்து கிரிக்கெட் ரசிகர்களுமே இவரது கம்பேக்கிற்கு காத்திருக்கிறது.

கடந்த காலம் மாதிரியே வருண் விரைவில் திரும்ப வருவார் என்பதில் எங்களுக்கு எந்தச் சந்தேகமும் இல்லை. மன ரீதியாக வருண் நன்றாகவே இருக்கிறார்.

கடந்தாண்டுகளில் அவர் அதிகமாக சாதித்து விட்டதால், அவர் மீது அதீத எதிர்பார்ப்பு இருக்கிறது. இந்தியாவுக்காக அவர் சிறப்பாக செயல்பட்டதால்தான் அவரை மிகவும் அச்சுறுத்தலான பந்துவீச்சாளர் எனக் கூறுகிறார்கள்.

புள்ளிவிவரங்களின்படி வருண் அதே வேகம், அதே லெந்தில்தான் பந்துவீசுகிறார். சில நேரங்களில் வீரர்கள் சிறப்பாக செயல்பட்டு விடுகிறார்கள். வான்கடே சுழல்பந்து வீச்சாளர்களுக்கு சவாலானது. அவர் விக்கெட் எடுக்க தொடங்கினால், வேறு மாதிரியான வீரராக மாறிவிடுவார் எனக் கூறினார்.