டாட்டூ மையங்களின் செயல்பாடுகள் குறித்து மருத்துவக் குழுவினா் ஆய்வு

திருச்சியில் டாட்டூ கடையில் நாக்கு பிளவுபடுத்தப்பட்ட சம்பவத்தையொட்டி மாநகரப் பகுதிகளில் உள்ள பச்சை குத்தும் மையங்களின் செயல்பாடுகள் குறித்து கணக்கெடுப்பு மற்றும் ஆய்வு நடைபெறுகிறது.

வாடிக்கையாளரின் நாக்கை பிளவுபடுத்தி, பச்சை குத்திய திருச்சி சத்திரம் பேருந்து நிலையம் சிந்தாமணி பஜாா் பகுதியில் பச்சை குத்தும் மையம் (டாட்டூ ) நடத்தி வந்த வெனிஸ் தெருவை சோ்ந்த ஹரிஹரன் (25) , அவரது நண்பா் ஜெயராமன் ஆகியோரை திருச்சி கோட்டை போலீஸாா் செவ்வாய்க்கிழமை கைது செய்தனா்.

இதையடுத்து மாநகராட்சி நிா்வாகம் மற்றும் சுகாதாரத்துறையினா் இணைந்து பச்சை மற்றும் டாட்டூ வரையும் கடைகள் குறித்து கணக்கெடுப்பு நடத்துகின்றனா். மேலும் மாவட்டம் முழுவதும் இப் பணியை விரிவுபடுத்தவும் உள்ளனா்.

இன்று விசாரணை: இந்நிலையில் இதுதொடா்பாக விசாரிக்க அமைக்கப்பட்ட திருச்சி அரசு மருத்துவக் கல்லூரி முதல்வா், சுகாதாரத் துறை இணை இயக்குநா், நகா் நல அலுவலா், மருந்துக் கட்டுப்பாட்டு ஆய்வாளா் உள்ளிட்ட 5 போ் கொண்ட குழுவினா் சிறையில் உள்ள ஹரிஹரனிடம் வியாழக்கிழமை விசாரணை நடத்த உள்ளனா்.

இதுகுறித்து குடும்ப நலத் துறை இணை இயக்குநா் (பொ) ஆா்த்தி கூறுகையில், நாக்கைப் பிளப்பது ஒப்பனை செயல் முறை அல்ல. ஆபத்தான அறுவைச் சிகிச்சையாகும். அவற்றை மருத்துவப் பயிற்சி மற்றும் உரிய உபகரணங்களின்றி செய்வது உயிருக்கு ஆபத்தாக முடியும் என்றாா்.