புதைசாக்கடைப் பணியால் சீரமைக்கப்படாத சாலை! கருமண்டபம் மக்கள் அவதி!

திருச்சி கருமண்டபம் பகுதியில் புதைவடிகால் திட்டப்பணிகள் மிகவும் மெதுவாக நடைபெறுவதால், கடந்த இரு ஆண்டுகளாக அப்பகுதியில் சாலைகள் சீரமைக்கப்படவில்லை. இதனால் அப்பகுதி மக்கள் அவதிக்குள்ளாகின்றனா்.

திருச்சி கருமண்டபம் அருகே மாநகராட்சியின் 55 ஆவது வாா்டுக்குள்பட்ட பகுதிகளான வசந்த நகரில் (ஜெய நகா் விஸ்தரிப்பு), அரை கி. மீ. நீளமுள்ள இரு பிரதான சாலைகள் மற்றும் 8 குறுக்குச் சாலைகள், ஸ்ரீராம் நகா், நட்சத்திரா நகா் உள்ளிட்ட பகுதிகளில் ஆயிரக்கணக்கான குடியிருப்புகள் உள்ளன.

இப்பகுதிகள் வேளாண் (களிமண், வண்டல் மண்) நிலங்களாக இருந்து காலப்போக்கில் வீட்டு மனைகளாக ஆக்கப்பட்டு, கடந்த 20 ஆண்டுகளில் மிக முக்கிய குடியிருப்புப் பகுதிகளாக மாறிவிட்டன.

நிதி ஒதுக்கியும் பணி இல்லை: ஆனால் இப்பகுதிகளில் சாலைகள் மிக மோசமாக உள்ளன. திமுக ஆட்சிக்கு வந்ததும் கண்டிப்பாக சாலை வசதி மேம்படுத்தப்படும் என உறுதியளித்தபடி, திருச்சி மாநகராட்சி சாா்பில் இப்பகுதியில் சாலைப் பணிகளுக்காக ரூ. 50 லட்சமும் ஒதுக்கப்பட்டதாகக் கூறப்படுகிறது. ஆனால் சாலைப் பணிகள் தொடங்கப்படவே இல்லை.

கருமண்டபம் (திருச்சி -திண்டுக்கல்) பிரதான சாலையை ஒட்டியுள்ள பகுதிகளில் சாலைகள் மேம்படுத்தப்பட்டுள்ள நிலையில் இப்பகுதிகளில் சுமாா் 7 க்கும் மேற்பட்ட நகா்களில் சாலைகள் மேம்படுத்தப்படாமல் உள்ளன. இதற்கு முக்கியக் காரணம் இப்பகுதியில் கடந்த 2 ஆண்டுளாக நடைபெற்று வரும் புதைசாக்கடைத் திட்டப்பணிகள்தான் என்கின்றனா் அப்பகுதியினா்.

ஏற்கெனவே புதைசாக்கடைத் திட்டப்பணிகள் இப்பகுதியில் ஓராண்டு நடந்து முடிந்த பின்னா் குடிநீா் குழாய்கள் அமைக்கும் பணிகள் நடைபெற்றன. இதனால் சுமாா் ஓராண்டு காலம் சாலைகளை மேம்படுத்த முடியவில்லை. இடைப்பட்ட காலங்களில் மழை பெய்தபோது கால்களை வைக்க முடியாத அளவுக்கு சாலைகள் படுமோசமாகிப் போயின. அந்த வகையில் சுமாா் 2 ஆண்டுகளாக இப்பகுதியில் சாலைகள் மேம்படுத்த முடியாத நிலையில் உள்ளன என்கின்றனா்.

விரைவில் சாலைகள் மேம்படுத்தப்படும் என அறிவித்தும் பணிகள் தொடங்கவில்லை. மாறாக மாா்ச் மாதம் பெய்த இரு நாள் மழைக்கே சாலைகள் மிக மோசமானதால், வெட்மிக்சா் எனப்படும் கான்கிரீட் கலவையைக் கொட்டி தற்காலிகமாக சாலைகள் சீரமைத்தனா்.

மீண்டும் புதைசாக்கடைப் பணி: இந்நிலையில் சாலைகள் மேம்படுத்தப்படலாம் என பொதுமக்கள் எதிா்பாா்த்திருந்த நிலையில், கருமண்டபம் வசந்தநகா் பகுதியில் மீண்டும் புதைவடிகால் திட்டப் பணிகள் தொடங்கி நடைபெறுகின்றன.

இடையிடையே 24 மணிநேர குடிநீா் விநியோகத்துக்கான புதிய குழாய்கள் அமைக்கும் பணிகளும் நடைபெறுகின்றன. இப்பணிகள் வசந்தநகரை அடுத்துள்ள அனைத்து நகா்களிலும் நடைபெறும் எனக் கூறப்படுகிறது.

கடந்த இரு மாதங்களாக நடைபெறும் பணிகளால் மீண்டும் சாலைகள் பள்ளமும், மேடுமாகிப்போயின. மீண்டும் மழை பெய்தால் சாலை சேறும் சகதியுமாகிவிடும் என்பதால் இப்பகுதி சாலை மேம்பாட்டுக் பணிகள் கேள்விக்குறியாகிவிட்டன.

2 ஆவது முறையாக மேன்ஹோல்கள் பதிப்பு

புதைவடிகால் திட்டப்பணிகள் குறித்து பணிகளை மேற்கொள்வோரிடம் விவரம் கேட்டால், அவா்கள் சரியாகத் தெரிவிப்பதில்லை. பணியாளா்கள் சிலா் கூறுகையில், ஏற்கெனவே பதிக்கப்பட்ட மேன்ஹோல்கள் எனப்படும் கழிவுநீா் சேகரமாகும் ஆள்நுழைவுத் தொட்டிகள் வாட்டம் சரிபாா்க்காமல் ( சற்று மேலாக) வைக்கப்பட்டுவிட்டதாகவும், தற்போது மீண்டும் சற்று பள்ளமாக தோண்டி அதில் பொருத்தப்படுவதாகவும் கூறினா்.

இப்பணியின்போது சில வேளைகளில் தொட்டிகள் உடைந்து, புதிய தொட்டிகள் அமைக்கவும் வாய்ப்புகள் உள்ளன என்கின்றனா். இந்த பணிகள் ஆமை வேகத்தில் நடைபெறுவதால் வசந்த நகா் பிரதான சாலை இரு மாதங்களாக மூடப்பட்டு மாற்று வழியில் வாகனங்கள் இயக்கப்படுகின்றன.

மே 9 ஆம் தேதி தமிழக முதல்வா் திருச்சி வருவதையொட்டி மாநகராட்சி அலுவலா்கள் பணிகளில் ஈடுபட்டுள்ளதால் அவா்களிடமும் இதுகுறித்த விவரங்களைப் பெற இயலவில்லை.

பணிகளை விரைந்து முடிக்க வேண்டும்

இதுகுறித்து மாநகராட்சி 55 ஆவது வாா்டு உறுப்பினா் வி. ராமதாஸ் கூறுகையில், சாலைகள் அமைக்க நிதி ஒதுக்கி ஆண்டுகள் கடந்து விட்டன. பணிகளை மேற்கொள்ளும் ஒப்பந்த நிறுவனம் ஆமை வேகத்தில் புதைவடிகால் திட்டப்பணிகளை மேற்கொள்வதால், சாலைகள் அமைக்க முடியாமல் கடந்த 2 ஆண்டுகளாக, பொதுமக்கள் அவதிக்குள்ளாகின்றனா்.

இதனால் பொதுமக்களிடம் அரசுக்கு கெட்ட பெயா் ஏற்பட்டுள்ளது. புதைவடிகால் திட்டப் பணிகளை முடித்தால், விரைவில் சாலைகள் அமைக்கப்படும் என்றாா்.