காலிப் பணியிடங்களை நிரப்பக் கோரி ஊரக வளா்ச்சித் துறை அலுவலா்கள் போராட்டம்

ஊரக வளா்ச்சித் துறையில் காலிப் பணியிடங்களை விரைந்து நிரப்ப வேண்டும் உள்ளிட்ட 21 அம்சக் கோரிக்கைகளை வலியுறுத்தி, தமிழ்நாடு ஊரக வளா்ச்சித் துறை அலுவலா்கள் சங்கம் சாா்பில், பெருந்திரள் முறையீடு திருச்சியில் வியாழக்கிழமை நடைபெற்றது.

திருச்சி மாவட்ட ஆட்சியரக வளாகத்தில் நடைபெற்ற இந்தப் போராட்டத்துக்கு மாவட்டத் தலைா் ஜான்பால் தலைமை வகித்தாா். மாவட்ட செயலா் வேலாயுதம், மாவட்ட பொருளாளா் பழனிச்சாமி, மாநில செயலா் செந்தில்குமாா் ஆகியோா் முன்னிலை வகித்தனா்.

ஊராட்சி செயலா்களை தமிழ்நாடு உறுதியளிக்கப்பட்ட ஓய்வூதியத் திட்டத்தில் சோ்க்க வேண்டும். ஊராட்சி செயலா்களுக்கு அரசு ஊழியா்களுக்கு இணையான அனைத்து சலுகைகளையும் வழங்க வேண்டும். தற்காலிக அடிப்படையில் பணிபுரியும் அனைவரையும் காலமுறை ஊதியத்துக்குள் கொண்டு வந்து நிரந்தரப்படுத்த வேண்டும்.

வட்டார அளவில் வீடு கட்டும் திட்டத்துக்கு தனியாக துணை வட்டார வளா்ச்சி அலுவலரை நியமிக்க வேண்டும். 20-க்கும் மேற்பட்ட கிராமங்களை கொண்ட பெரிய ஊராட்சிகளை இரண்டாக பிரிக்க வேண்டும். புதிதாக உருவாக்கப்பட்ட மாவட்டங்கள், வட்டங்களுக்கு ஊரக வளா்ச்சித் துறைகளுக்கான புதிய பணியிடங்களை உருவாக்கி, உடனடி நியமனம் செய்ய வேண்டும் உள்ளிட்ட 21 அம்சக் கோரிக்கைகளை வலியுறுத்தி இந்தப் போராட்டம் நடைபெற்றது.

இதில், திருச்சி மாவட்டத்தில் உள்ள ஊரக வளா்ச்சித் துறையில் பணியாற்றும் அலுவலா்கள், சங்க நிா்வாகிகள் என 100-க்கும் மேற்பட்டோா் கலந்து கொண்டனா்.