வீடுகள் ஒதுக்கீடு செய்யப்படாத விவகாரம்: மாா்க்சிஸ்ட் கம்யூ. கட்சியினா் போராட்டம்

தமிழ்நாடு நகா்ப்புற வாழ்விட மேம்பாட்டு வாரியத்தில் பயனாளிகளுக்கு வீடுகள் ஒதுக்கீடு செய்யப்படாததை கண்டித்து, திருச்சியில் மாா்க்சிஸ்ட் கம்யூனிஸ்ட் கட்சியினா் புதன்கிழமை போராட்டத்தில் ஈடுபட்டனா்.

திருச்சி கல்மந்தை குடியிருப்பில் வசித்த 5 குடும்பத்தினருக்கு ஆட்சியா் பரிந்துரைத்தும், தமிழ்நாடு நகா்ப்புற வாழ்விட மேம்பாட்டு வாரியத்தில் வீடுகள் வழங்கப்படவில்லையாம்.

இதுதொடா்பாக, பேச்சுவாா்த்தை நடத்தி பயனாளிகளுக்கு வீடுகள் வழங்கப்படும் என உறுதிமொழி அளித்து 6 மாதங்களாகியும் வீடுகள் ஒதுக்கீடு செய்யப்படவில்லையாம்.

இதை கண்டித்து திருச்சி பாலக்கரையில் இயங்கும் தமிழ்நாடு நகா்புற வாழ்விட மேம்பாட்டு வாரிய அலுவலகம் முன்பு மாா்சிஸ்ட் கம்யூனிஸ்ட் கட்சி மற்றும் பயனாளிகளின் குடும்பத்துடன் போராட்டத்தில் ஈடுபட்டனா்.

போராட்டத்துக்கு மலைக்கோட்டை பகுதி மாா்க்சிஸ்ட் கம்யூனிஸ்ட் கட்சியின் செயலா் ஜி.கே. ராமா் தலைமை வகித்தாா். இதில், முன்னாள் மாவட்ட செயலா் ராஜா உள்ளிட்ட பலா் கலந்து கொண்டனா்.