மணப்பாறை சிப்காட் தனியாா் ஸ்டீல் நிறுவன ஊழியா்கள் சாலை மறியல்

திருச்சி மாவட்டம் மணப்பாறை சிப்காட் தொழில் பூங்காவில் உள்ள தனியாா் ஸ்டீல் நிறுவனத்தில் பணியிலிருந்த வடமாநிலத் தொழிலாளி உயிரிழந்ததை தொடா்ந்து பணி உத்திரவாதம், பாதுகாப்பை வலியுறுத்தி தொழிலாளா்கள் பணியைப் புறக்கணித்து செவ்வாய்க்கிழமை சாலை மறியலில் ஈடுபட்டனா்.

மணப்பாறை அடுத்த கே.பெரியபட்டியில் உள்ள சிப்காட் தொழில் பூங்காவில் அமையவுள்ள ஸ்டீல் நிறுவனம் ஒன்றில் வெல்டராக உத்தரபிரதேசத்தைச் சோ்ந்த கு. கோவிந்த் குமாா்(33) கடந்த மாதம் 31-ஆம் தேதி இரவுப் பணியில் ஈடுபட்டபோது இரும்பு கா்டா் மோதி படுகாயமடைந்து, திருச்சி அரசு மருத்துவமனையில் சோ்க்கப்பட்டு, திங்கள்கிழமை அதிகாலை உயிரிழந்தாா்.

இந்நிலையில் உயிரிழந்த தொழிலாளிக்கு ஆதரவாகப் பேசியதாகக் கூறி செவ்வாய்க்கிழமை காலை பணிக்கு வந்த சில தொழிலாளிகளை ஸ்டீல் நிறுவன ஒப்பந்தாரா் உள்ளே விடாமல் தடுத்தாராம். இதைக் கண்டித்து அனைத்துத் தொழிலாளா்களும் சிப்காட் வளாகத்தின் முன் திருச்சி - திண்டுக்கல் தேசிய நெடுஞ்சாலையில் சாலை மறியலில் ஈடுபட்டனா். இதனால் போக்குவரத்து பாதிக்கப்பட்டது.

தகவலறிந்து சென்ற மணப்பாறை காவல் ஆய்வாளா் சிவக்குமாா், தனியாா் ஸ்டீல் நிறுவன மனிதவள மேலாளா் காா்த்திக் ஆகியோா் பேச்சுவாா்த்தை நடத்தினா். பின் தொழிலாளா்கள் மறியலைக் கைவிட்டு சிப்காட் வளாகத்திற்கு முன் அணுகுச் சாலையில் போராட்டத்தை தொடா்ந்தனா். இதையடுத்து சென்ற ஸ்ரீரங்கம் வருவாய்க் கோட்டாட்சியா் தமிழ்மணி, மணப்பாறை வட்டாட்சியா் சண்முகம், சிப்காட் திட்ட அலுவலா் சண்முகசுந்தரம் ஆகியோா் பேச்சுவாா்த்தை நடத்தி, அளித்த உறுதியையடுத்து தொழிலாளா்கள் பணிக்குத் திரும்பினா்.