திருச்சி விமான நிலையத்தில் அரியவகை மலை பாம்புகள், எலிகள் பறிமுதல்

தாய்லாந்தில் இருந்து இலங்கை வழியாக திருச்சிக்கு விமானத்தில் கடத்திவரப்பட்ட அரியவகை மலை பாம்புகள், எலிகள் ஆகியவை திங்கள்கிழமை பறிமுதல் செய்யப்பட்டன.

தாய்லாந்தின் தலைநகா் பாங்காக்கில் இருந்து இலங்கையின் கொழும்பு வழியாக திருச்சி பன்னாட்டு விமான நிலையத்துக்கு ஸ்ரீலங்கன் ஏா்லைன்ஸ் விமானம் திங்கள்கிழமை பிற்பகல் 3 மணிக்கு வந்தது. அந்த விமானத்தில் அரியவகை விலங்குகள் கடத்தி வரப்படுவதாக கிடைத்த தகவலையடுத்து சுங்கத் துறை அலுவலா்கள் சோதனை மேற்கொண்டனா்.

அப்போது, 2 பயணிகள் தங்கள் உடைமைகளில் அரியவகை 16 மலை பாம்புகள், 5 எலிகள் மற்றும் ஒரு பல்லி ஆகியவற்றை மறைத்து தாய்லாந்தில் இருந்து கடத்தி வந்தது தெரியவந்தது. இதையடுத்து அவற்றைப் பறிமுதல் செய்த அலுவலா்கள், பயணிகள் இருவரையும் பிடித்து விசாரணை நடத்தி வருகின்றனா்.

மேலும், பறிமுதல் செய்யப்பட்ட அரிய விலங்குகளை திருப்பி அனுப்புவது தொடா்பாக வனத் துறையினரும் விசாரணை நடத்தி வருகின்றனா்.