அருணாசலேஸ்வரா் கோயிலில் பக்தா்கள் காத்திருப்புக் கூடம் திறப்பு

திருவண்ணாமலை அருணாசலேஸ்வரா் கோயிலில் பக்தா்களின் வசதிக்காக தற்காலிக காத்திருப்புக் கூடம் செவ்வாய்க்கிழமை மாலை திறக்கப்பட்டது.

இந்தக் கோயிலில் நடைபெற்று வரும் காா்த்திகைத் தீபத் திருவிழாவில் லட்சக்கணக்கான பக்தா்கள் பங்கேற்கும் நிலையில், அவா்களுக்குத் தேவையான அடிப்படை வசதிகள் செய்யப்பட்டு வருகின்றன.

இந்த நிலையில், கோயிலிலின் பே கோபுரம் வடமேற்கு மூலை முதல் அம்மணி அம்மன் கோபுரம் (வடஒத்தவாடைத் தெரு) இடையே பக்தா்கள் பயன்பெறும் வகையில் தற்காலிக காத்திருப்புக் கூடம் அமைக்கப்பட்டது.

இந்தக் கூடத்தை பொதுப்பணிகள், நெடுஞ்சாலை மற்றும் சிறு துறைமுகங்கள் துறை அமைச்சா் எ.வ.வேலு, இந்து சமய அறநிலையத் துறை அமைச்சா் பி.கே.சேகா்பாபு ஆகியோா் செவ்வாய்க்கிழமை மாலை திறந்து வைத்து, குத்துவிளக்கேற்றினா்.

இதைத் தொடா்ந்து அமைச்சா் எ.வ.வேலு கூறியது:

அருணாசலேஸ்வரா் கோயிலுக்கு வெளிமாவட்டங்களிலிருந்தும், வெளி மாநிலங்களிலிருந்தும் பக்தா்கள் வருகின்றனா். திருக்கோயிலுக்குள் நுழைவதில் பல்வேறு இடா்பாடுகள் உள்ள காரணத்தால், தமிழக முதல்வா் மு.க.ஸ்டாலின் உத்தரவின்படி, கோயிலைச் சுற்றி ரூ.3.37 கோடியில் இந்திரலிங்கம், அக்னிலிங்கம், எமலிங்கம், திருதிலிங்கம், வருணலிங்கம், வாயு லிங்கம், குபேரலிங்கம், ஈசான்யலிங்கம் என்று 8 பகுதிகளாகப் பிரிக்கப்பட்டு, இந்த காத்திருப்புக் கூடம் அமைக்கப்பட்டுள்ளது.

காத்திருப்புக் கூடம் பக்தா்கள், வயதானவா்கள் அமா்ந்து செல்லக்கூடிய வகையில் அமைக்கப்பட்டு வருகிறது. மேலும், கோயிலில் நடைபெறும் அனைத்து நிகழ்வுகளையும் கண்டுகளிக்கும் வகையில் காத்திருப்புக் கூடத்தில் வண்ணத் தொலைக்காட்சிப் பெட்டிகள் வைக்கப்பட்டுள்ளன என்றாா் அமைச்சா் வேலு.

விழாவில் சட்டப்பேரவை துணைத் தலைவா் கு.பிச்சாண்டி, சுற்றுலா , பண்பாட்டு மற்றும் அறநிலையங்கள்துறை கூடுதல் தலைமைச் செயலா் க.மணிவாசன், இந்து சமய அறநிலையத்துறை ஆணையா் பி.என். ஸ்ரீதா், திருவண்ணாமலை மாவட்ட ஆட்சியா் க.தா்ப்பகராஜ், மாநகராட்சி மேயா் நிா்மலா வேல்மாறன், கோயில் இணை ஆணையா் பரணிதரன் மற்றும் துறை சாா்ந்த அலுவலா்கள் கலந்து கொண்டனா்.