பிரதோஷம்: சிவன் கோயில்களில் சிறப்புப் பூஜை

பிரதோஷ விழாவை முன்னிட்டு, மாவட்டத்திலுள்ள பல்வேறு சிவன் கோயில்களில் வெள்ளிக்கிழமை நந்தீஸ்வரருக்கு சிறப்புப் பூஜை, அபிஷேகம் நடைபெற்றது.

பிரதோஷத்தின் போது ஈஸ்வரன் கோயிலில் உள்ள நந்தி பகவானுக்கு சிறப்பு பூஜைகள் நடைபெறுவது வழக்கம். இதேபோல் வெள்ளிக்கிழமை பிரதோஷம் என்பதால், கடலூர் திருப்பாதிரிபுலியூர் பாடலீசுவரர் கோயிலில் உள்ள நந்தீஸ்வரருக்கு சிறப்பு பூஜைகள் நடத்தப்பட்டன.

இதைத் தொடர்ந்து, பால், தயிர், தேன், சந்தனம், மஞ்சள் உள்ளிட்ட பொருள்களால் அபிஷேகம் செய்யப்பட்டது. பின்னர், பெரியநாயகி சமேத பாடலீசுவரருக்கு சிறப்பு பூஜைகள் நடைபெற்றன.

நிகழ்ச்சியில் ஏராளமான பக்தர்கள் பங்கேற்று சுவாமி தரிசனம் செய்தனர். இதேபோல், மாவட்டம் முழுவதுமுள்ள சிவன் கோயில்களில் பிரதோஷ விழா கொண்டாடப்பட்டது.

விருத்தாசலம்: இதேபோல், விருத்தாசலம் பழமலைநாதர் கோயிலில் நுழைவு வாயில் மண்டபத்தில் உள்ள நந்தீஸ்வரருக்கு பிரதோஷத்தை முன்னிட்டு சிறப்பு அபிஷேகம் மற்றும் பூஜைகள் நடைபெற்றன. இதில், ஏராளமான பக்தர்கள் கலந்துகொண்டு நந்தீஸ்வரரை வழிபட்டுச் சென்றனர்.