‘உர விற்பனையில் முறைகேட்டில் ஈடுபட்டால் நடவடிக்கை’

கடலூா் மாவட்டத்தில் உர விற்பனையில் முறைகேட்டில் ஈடுபடுவோா் மீது நடவடிக்கை எடுக்கப்படுமென வேளாண்மைத் துறை இணை இயக்குநா் ஜி.ஆா்.முருகன் எச்சரித்தாா்.

கடலூா் மாவட்டத்தில் உர விற்பனையில் முறைகேட்டில் ஈடுபடுவோா் மீது நடவடிக்கை எடுக்கப்படுமென வேளாண்மைத் துறை இணை இயக்குநா் ஜி.ஆா்.முருகன் எச்சரித்தாா்.

இதுகுறித்து அவா் வெளியிட்ட செய்திக்குறிப்பு: கடலூா் மாவட்டத்தில் சம்பா பருவத்தில் 97 ஆயிரம் ஹெக்டேரில் நெல் பயிா், 22,500 ஹெக்டேரில் மக்காச்சோளம், 10,800 ஹெக்டேரில் பருத்தி, 8,878 ஹெக்டேரில் மணிலா, 50,190 ஹெக்டேரில் உளுந்து, 18,570 ஹெக்டேரில் கரும்பு, 20 ஆயிரம் ஹெக்டேரில் முந்திரி, 6 ஆயிரம் ஹெக்டேரில் வாழை, 5 ஆயிரம் ஹெக்டேரில் மரவள்ளி சாகுபடி நடைபெற்று வருகிறது.

இந்தப் பயிா்களுக்கு தேவைப்படும் ரசாயன உரங்கள் கூட்டுறவு கடன் சங்கங்கள், தனியாா் உர விற்பனை நிலையங்கள் மூலமாக விற்பனை செய்யப்பட்டு வருகிறது. உர வழங்கல் திட்ட அடிப்படையில் மாவட்டத்துக்குத் தேவையான உரங்கள் அரசிடமிருந்து தொடா்ந்து பெறப்பட்டு வருகிறது.

உரங்களை வேளாண்மைத் துறையில் உரிமம் பெற்ற விற்பனையாளா்கள் மட்டுமே விற்பனை செய்ய வேண்டும். விற்பனையின்போது விற்பனை முனை இயந்திரத்தின் மூலமே பட்டியலிட்டு விற்பனை ரசீது வழங்க வேண்டும். தினசரி உர இருப்பு குறித்த தகவல்களை விவசாயிகள் பாா்வையில் படும்படி வைக்க வேண்டும்.

பிற மாவட்டங்களிலிருந்து உரங்கள் கொள்முதல் செய்யப்படுவதோ பிற மாவட்டங்களுக்கு விற்பனை செய்யப்படுவதோ உர நகா்வு கட்டுப்பாட்டு சட்டப்படி குற்றமாகும். அவ்வாறு செய்பவா்கள், அதிக விலைக்கு உரம் விற்போா், சரியான எடையில் உரங்களை விற்பனை செய்யாதவா்கள் மீதும் நடவடிக்கை எடுக்கப்படும்.

விவசாயிகள் உரம் வாங்கச் செல்லும்போது தங்களது ஆதாா் அட்டையை எடுத்து செல்ல வேண்டும். மண்வள அட்டை மூலம் பரிந்துரைக்கப்படும் உர அளவை மட்டும் விவசாயிகள் பயன்படுத்தி செலவைக் குறைக்கலாம்.

உர விற்பனையில் முறைகேடு நடைபெறுவது தெரியவந்தால் விவசாயிகள் வேளாண்மை இணை இயக்குநா் அலுவலகத்தை 04142-290658 என்ற எண்ணில் தொடா்புகொண்டு புகாா் அளிக்கலாம் என்று அதில் தெரிவித்துள்ளாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

Related Stories

No stories found.
Dinamani
www.dinamani.com