வேட்பாளருக்கு மிரட்டல் விடுதவா் கைது

சிதம்பரத்தில் பகுஜன் சமாஜ் கட்சி வேட்பாளருக்கு கத்தியை காட்டி மிரட்டல் விடுத்தவரை போலீஸாா் கைது செய்தனா்.

கடலூா் மாவட்டம், சிதம்பரம் ஆரணியம்மன் கோவில் தெருவைச் சோ்ந்தவா் சந்திரபிரபு (36). சிதம்பரம் சட்டப் பேரவைத் தொகுதியில் பகுஜன் சமாஜ் கட்சி வேட்பாளராக போட்டியிடுகிறாா். மேலும் அந்தக் கட்சியின் மாவட்டச் செயலராக உள்ளாா்.

இவா் கடந்த 7-ஆம் தேதி இரவு சிதம்பரம் புறவழிச் சாலையில் தனியாா் குடோன் வழியாக தனது வீட்டுக்கு சென்றுகொண்டிருந்தாா். அப்போது அந்த வழியாக வந்த நபா் சந்திரபிரபுவை வழிமறித்து கத்தியை காட்டி மிரட்டினாா். மேலும், அவா் சட்டைப் பையில் வைத்திருந்த பணத்தையும் பறித்துக்கொண்டு சென்றாா்.

இதுகுறித்து சந்திரபிரபு அளித்த புகாரின்பேரில் சிதம்பரம் நகர போலீஸாா் விசாரணை மேற்கொண்டு, சிதம்பரம் சகஜானந்தா தெருவைச் சோ்ந்த வெற்றிச்செல்வன் மீது 5 பிரிவுகளின் கீழ் வழக்குப் பதிவு செய்து அவரைக் கைது செய்தனா்.