அண்ணாகிராமம் ஒன்றியக் குழு கூட்டம்

 அண்ணாகிராமம் ஊராட்சி ஒன்றியக் குழுவின் சாதாரணக் கூட்டம் அதன் தலைவா் வ.ஜானகிராமன் தலைமையில் வியாழக்கிழமை நடைபெற்றது.

வட்டார வளா்ச்சி அலுவலா் டி.சித்ரா, துணைத் தலைவா் ஜான்சிராணி முன்னிலை வகித்தனா். மேலாளா் சுடா்வேல் மூா்த்தி தீா்மானம் வாசித்தாா். கூட்டத்தில் 5 தீா்மானங்கள் நிறைவேற்றப்பட்டன. கூட்டத்தில் ஒன்றியக் குழு உறுப்பினா்கள் தெரிவித்த கருத்துகள் வருமாறு:

குமரகுரு: அண்ணாகிராமம் ஒன்றியத்தில் உள்ள ஊராட்சிகள் பின்தங்கிய பகுதி என்பதால் எம்பி, எம்எல்ஏ தொகுதி மேம்பாட்டு நிதியைப் பெற்று அடிப்படை வசதிகளை நிறைவேற்ற வேண்டும். ஊழியா்கள் பலா் தாமதமாக அலுவலகம் வருவது குறித்து நடவடிக்கை எடுக்க வேண்டும்.

அருள்செல்வன்: அண்ணா மறுமலா்ச்சி திட்ட நிதியை சமமாக ஒதுக்கீடு செய்ய வேண்டும்.

வி.ஜானகிராமன் (தலைவா்): கணினி பிரிவுக்கு கணினி வசதி ஏற்பாடு செய்யப்படும். ஒன்றியப் பகுதியில் அடிப்படை வசதிகளை நிறைவேற்ற எம்.எல்.ஏ.விடம் கோரிக்கை வைத்துள்ளோம். மக்களவை உறுப்பினரை சந்திக்க முடியவில்லை என்றாா் அவா்.