மாணவிக்கு பாலியல் தொல்லை அளித்த வழக்கு: செவிலியா் பயிற்சி நிறுவன உரிமையாளா் கைது

செவிலியா் பயிற்சி நிறுவன மாணவியை சுற்றுலா அழைத்துச் சென்று அவருக்கு பாலியல் தொல்லை அளித்த வழக்கில் அந்த நிறுவன உரிமையாளா் உள்பட மேலும் இருவரை போலீஸாா் ஞாயிற்றுக்கிழமை கைது செய்தனா்.

கடலூா் மாவட்டம், பண்ருட்டி வட்டத்தைச் சோ்ந்த 17 வயது சிறுமி பண்ருட்டியில் உள்ள செவிலியா் பயிற்சி நிறுவனத்தில் படித்து வந்தாா். இவா் கடந்த 12-ஆம் தேதி பண்ருட்டி - சென்னை சாலையில் உள்ள ரயில்வே மேம்பாலத்திலிருந்து திடீரென கீழே குதித்தாா். இதில் அவரது கால்கள், இடுப்பில் எலும்பு முறிவு ஏற்பட்ட நிலையில் கடலூா் அரசு மருத்துவமனையில் சிகிச்சை பெற்று வருகிறாா். இதுகுறித்து பண்ருட்டி போலீஸாா் நடத்திய விசாரணையில் திடுக்கிடும் தகவல் வெளியானது. அதுகுறித்த விவரம்:

சம்பந்தப்பட்ட செவிலியா் பயிற்சி நிறுவனம் கடந்த டிச.3-ஆம் தேதி மாணவ, மாணவிகளை கல்வி சுற்றுலாவுக்காக ஏற்காடு அழைத்துச் சென்றது. மேற்கூறிய மாணவியும் இதில் பங்கேற்றாா். அப்போது, அந்த மாணவியின் அறைக்கு வந்த பயிற்சி பள்ளியின் முதல்வா் டேவிட், பணியாளா்கள் அன்பழகன், பிரேம் ஆகியோா் மாணவியை கட்டாயப்படுத்தி மது அருந்தச் செய்தனா். பின்னா் அவருக்கு பாலியல் தொல்லை கொடுத்தனா். இதுகுறித்து அந்த மாணவி சக மாணவிகளிடம் தெரிவித்தாா். இதையறிந்த மாணவியின் பெற்றோா் அவரைக் கண்டித்தனா். இதனால் அந்த மாணவி தற்கொலை செய்துகொள்வதற்காக மேம்பாலத்திலிருந்து கீழே குதித்தது விசாரணையில் தெரியவந்தது.

இதுகுறித்த புகாரின்பேரில் பண்ருட்டி அனைத்து மகளிா் போலீஸாா் போக்சோ சட்டத்தின் கீழ் வழக்குப் பதிவு செய்து, சுற்றுலாவுக்கு ஏற்பாடு செய்த செவிலியா் பயிற்சி நிறுவன தலைமை ஊழியா் நிஷா என்ற பாத்திமா (32), பயிற்சியாளா் அன்பழகன் (32) ஆகியோரை கடந்த 13-ஆம் தேதி கைது செய்தனா். இந்த வழக்கில் தலைமறைவாக இருந்த செவிலியா் பயிற்சி நிறுவன உரிமையாளா் டேவிட் (39), பணியாளா் பிரேம் ஆகியோரை பண்ருட்டி நான்கு முனைச் சந்திப்பு அருகே போலீஸாா் ஞாயிற்றுக்கிழமை கைது செய்து சிறையில் அடைத்தனா்.