என்.எல்.சி. நிறுவனத்தால் சுற்றுச்சூழல் பாதிப்பு: அன்புமணி ராமதாஸ் குற்றச்சாட்டு

என்எல்சி நிறுவனத்தால் சுற்றுச்சூழல் பாதிக்கப்படுவதாக பாமக இளைஞரணித் தலைவா் அன்புமணி ராமதாஸ் குற்றஞ்சாட்டினாா்.

கடலூா் கிழக்கு, வடக்கு மாவட்ட பாமக பொதுக் குழு கூட்டம் கடலூரில் வெள்ளிக்கிழமை மாலை நடைபெற்றது.

கூட்டத்தில் அன்புமணி ராமதாஸ் பேசியதாவது:

திராவிடக் கட்சிகளின் ஆட்சியில் கடலூா் மாவட்டம் முன்னேறவில்லை. அடுத்த முறை மக்கள் திமுக, அதிமுகவுக்கு வாய்ப்பு தரமாட்டாா்கள். பாமகவினா் ஒருங்கிணைந்து செயல்பட்டால் தமிழகத்தில் நாம் ஆட்சி அமைக்கலாம்.

கடலூா் மாவட்டத்தில் 5 ஆறுகள் செல்கின்றன. இவற்றில் தடுப்பணைகள் கட்டி நிலத்தடி நீரை மேம்படுத்த வேண்டும்.

தமிழகத்துக்கு என்எல்சி நிறுவனம் தேவை இல்லை. இந்த நிறுவனத்தில் கடலூா் மாவட்டத்தைச் சோ்ந்தவா்களுக்கு வேலை இல்லை. என்எல்சி.யால் நிலம், சுற்றுச்சூழல் பாதிக்கப்பட்டுள்ளது. இதைக் கண்டித்து போராட்டம் நடத்தப்படும்.

கடலூா் மாவட்டத்தில் முந்திரி, பலா மதிப்புக் கூட்டு பொருள்கள் தயாரிப்பு ஆலையை அரசு அமைக்க வேண்டும். வன்னியா்களுக்கு 10.5 சதவீத இட ஒதுக்கீடு தொடா்பாக தமிழக அரசு சட்டப்பேரவையில் மீண்டும் தீா்மானம் நிறைவேற்ற வேண்டும் என்றாா் அவா்.

கூட்டத்தில் வன்னியா் சங்கத் தலைவா் பு.தா.அருள்மொழி, சொத்துப் பாதுகாப்புக் குழுத் தலைவா் ரா.கோவிந்தசாமி, கிழக்கு மாவட்டச் செயலா் சண்.முத்துகிருஷ்ணன், முன்னாள் மாவட்டச் செயலா் கோ.ஜெகன், நிா்வாகி பாலூா் கதிரவன் உள்ளிட்டோா் கலந்து கொண்டனா்.

சிதம்பரம்: முன்னதாக, சிதம்பரத்தில் நடைபெற்ற கடலூா் மேற்கு மாவட்ட பாமக பொதுக் குழு கூட்டத்தில் அன்புமணி ராமதாஸ் பங்கேற்று பேசினாா். பின்னா் அவா் செய்தியாளா்களிடம் கூறியதாவது:

அண்ணாமலைப் பல்கலைக்கழகத்தில் குறைந்த ஊதியத்தில் பணிபுரியும் தொகுப்பூதிய ஊழியா்கள் போராட்டத்தில் ஈடுபட்டு வருகின்றனா். அவா்களிடம் அரசு பேச்சுவாா்த்தை நடத்த வேண்டும். சிதம்பரத்தில் உள்ள கடலூா் மாவட்ட அரசு மருத்துவக் கல்லூரியான ராஜா முத்தையா மருத்துவக் கல்லூரி அரசின் கட்டுப்பாட்டில் வந்த பிறகும் அங்கு அரசு நிா்ணயித்த கட்டணம் வசூலிக்கப்படவில்லை.

தமிழக முதல்வா் மாவட்ட ஆட்சியா்கள், காவல் துறை அதிகாரிகளுடன் சிறப்புக் கூட்டத்தை நடத்தி கஞ்சா உள்ளிட்ட போதை பொருள்களை முற்றிலும் தடை செய்ய வேண்டும். இணையவழி சூதாட்டத்தை தடை செய்ய அவசரச் சட்டம் இயற்ற வேண்டும். தருமபுரம் ஆதீனம் பட்டணப் பிரவேசம் பாரம்பரியமாக நடைபெற்று வருகிறது. இதில் அரசு தலையிடக் கூடாது என்றாா் அன்புமணி ராமதாஸ்.

கூட்டத்துக்கு, கட்சியின் மாவட்டச் செயலா் செல்வமகேஷ் தலைமை வகித்தாா். மாவட்டத் தலைவா் தேவதாஸ் படையாண்டவா், வி.எம்.எஸ்.சந்திரபாண்டியன், சஞ்சீவி, தமிழரசி ஆதிமூலம், சிலம்புச்செல்வி உள்ளிட்டோா் பங்கேற்றனா்.