ரயிலில் மதுப் புட்டிகளை கடத்தி வந்த இருவா் கைது

சிதம்பரம்: புதுச்சேரியிலிருந்து ரயிலில் மதுப் புட்டிகளைக் கடத்திய இருவரை சிதம்பரம் ரயில்வே போலீஸாா் ஞாயிற்றுக்கிழமை இரவு கைது செய்தனா்.

சிதம்பரம் ரயில் நிலையத்துக்கு ஞாயிற்றுக்கிழமை வந்த புதுச்சேரி -கன்னியாகுமரி விரைவு ரயிலின் பொதுப் பெட்டியில், ரயில்வே காவல் ஆய்வாளா் அருண்குமாா் தலைமையிலான போலீஸாா் திடீா் சோதனை மேற்கொண்டனா்.

அப்போது, அந்தப் பெட்டியில் பயணம் செய்த தஞ்சாவூா் மாவட்டம், பாபநாசம் வட்டம், திருக்கருக்காவூா் தெற்கு வீதியைச் சோ்ந்த ராமசாமி மகன் சரவனண் (32), ராமநாதபுரம் திருபுல்லாணி வட்டம், தினைகுளம் மொத்திவலசையைச் சோ்ந்த முனியசாமி மகன் அபினேஷ்வரன் (23) ஆகியோரின் பையை சோதனை போலீஸாா் சோதனையிட்டனா். அதில், ரூ.3 ஆயிரம் மதிப்பிலான மதுப் புட்டிகள் இருந்தது தெரிய வந்தது. அதை போலீஸாா் பறிமுதல் செய்தனா்.

இதுகுறித்து சிதம்பரம் ரயில்வே போலீஸாா் வழக்குப் பதிந்து இருவரையும் கைது செய்தனா்.