கோமாரி நோய் தடுப்பூசி முகாம்: ஆட்சியா் தொடங்கிவைத்தாா்

தேசிய கால்நடை நோய் தடுப்புத் திட்டத்தின் ஒன்பதாவது சுற்றின் கீழ், கால்நடைகளுக்கான கால், வாய் நோய் (கோமாரி) தடுப்பூசி முகாமை கடலூா் மாவட்டம், காரைக்காடு ஊராட்சி கே.புதூரில் ஆட்சியா் சிபி ஆதித்யா செந்தில்குமாா் புதன்கிழமை தொடங்கிவைத்தாா்.

கடலூா் மாவட்டத்தில் கடலூா், சிதம்பரம், விருத்தாசலம் கோட்டங்களுக்கு உள்பட்ட அனைத்து கிராமங்களிலும் 2.9 லட்சம் பசு மற்றும் எருமை இன கால்நடைகளுக்கு 100 சதவீத கோமாரி நோய் தடுப்பூசி செலுத்த இலக்கு நிா்ணயிக்கப்பட்டுள்ளது. இதற்காக, 95 சிறப்பு குழுக்கள் அமைக்கப்பட்டு பணியில் ஈடுபட்டுள்ளன.

இந்த நிலையில், கே.புதூரில் கால்நடைகளுக்கான கோமாரி நோய் தடுப்பூசி முகாமை ஆட்சியா் சிபி ஆதித்யா செந்தில்குமாா் தொடங்கிவைத்து, பேசியதாவது:

கால்நடைகளுக்கு கால் மற்றும் வாய் நோய் (கோமாரி), குறிப்பாக கலப்பின மாடுகளை அதிகளவில் பாதித்து, பால் உற்பத்தி குறைவு உள்ளிட்ட பொருளாதார இழப்புகளை ஏற்படுத்துகிறது. நோயால் பாதிக்கப்பட்ட பகுதிகளில் இருந்து கால்நடைகளை வாங்கி வருதல், சுகாதாரமற்ற பராமரிப்பு, தடுப்பூசி செலுத்தாமல் இருப்பது போன்ற காரணங்களால் இந்நோய் வேகமாக பரவும் அபாயம் உள்ளது.

எனவே, கால்நடை வளா்ப்போா் அனைவரும் தடுப்பூசி முகாமைப் பயன்படுத்திக்கொண்டு தங்களது கால்நடைகளுக்கு கட்டாயம் தடுப்பூசி செலுத்த வேண்டும். மேலும், நோய் அறிகுறிகள் தென்பட்டாலோ அல்லது பருவநிலை மாற்றத்தால் நோய் பரவும் அபாயம் ஏற்பட்டாலோ, கால்நடை பராமரிப்புத் துறை அறிவுறுத்தும் வழிமுறைகளை பின்பற்றி கால்நடைகளை பாதுகாக்க வேண்டும் என்றாா்.

முகாமில் 100 கால்நடை வளா்ப்போருக்கு கோ - 4 பசுந்தீவனம், தாது உப்புகள் மற்றும் கன்றுகளுக்கான குடற்புழு நீக்க மருந்துகள் வழங்கப்பட்டன.

நிகழ்ச்சியில் வருவாய்க் கோட்டாட்சியா் சுந்தரராஜன், மண்டல இணை இயக்குநா் (கால்நடை பராமரிப்பு) எஸ்.அன்புச்செழியன், உதவி இயக்குநா்கள் ராஜேஷ்குமாா், சு.வேங்கடலட்சுமி மற்றும் கால்நடை மருத்துவா்கள், ஆய்வாளா்கள், ஆய்வக உதவியாளா்கள், கால்நடை பராமரிப்பு உதவியாளா்கள் உள்ளிட்டோா் கலந்துகொண்டனா்.