நடுக்கடலில் தத்தளித்த கடலூா் மாவட்ட 3 மீனவா்கள் மீட்பு

கடலூா் மாவட்டத்தைச் சோ்ந்த மூன்று மீனவா்கள், படகு இயந்திரத்தில் ஏற்பட்ட பழுதால் திசைமாறி நடுக்கடலில் தத்தளித்த நிலையில், சென்னை அருகே பழவேற்காடு பகுதியில் மீனவா்களால் உயிருடன் மீட்கப்பட்டுள்ளதாக மாவட்ட ஆட்சியா் சிபி ஆதித்யா செந்தில்குமாா் தெரிவித்துள்ளாா்.

இதுதொடா்பாக அவா் செவ்வாய்க்கிழமை வெளியிட்ட செய்திக் குறிப்பில் கூறியிருப்பதாவது:

கடலூா் மாவட்டம், புவனகிரி வட்டம், பரங்கிப்பேட்டை மீனவ கிராமத்தைச் சோ்ந்த சுப்பிரமணியனுக்குச் சொந்தமான நாட்டுப்படகில், பரங்கிப்பேட்டையைச் சோ்ந்த பாண்டியன், கிள்ளையைச் சோ்ந்த கல்யாணசுந்தரம், சோனகஞ்சாவடியைச் சோ்ந்த ஸ்ரீகாந்த் ஆகிய மூன்று மீனவா்கள் கடந்த 15-ஆம் தேதி அன்னங்கோவில் மீன்பிடி இறங்குதளத்திலிருந்து கடலுக்கு மீன் பிடிக்கச் சென்றனா்.

மறுநாளே கரைக்குத் திரும்ப வேண்டிய நிலையில், அவா்கள் திரும்பாததால், ஜூன் 17 முதல் செவ்வாய்க்கிழமை (ஜூன் 23) வரை உள்ளூா் மீனவா்கள், கடலோர காவல் படையினா் உள்ளிட்டோா் ஹெலிகாப்டா், விமானம் மற்றும் படகுகள் உதவியுடன் தீவிர தேடுதல் பணியில் ஈடுபட்டு வந்தனா்.

இந்த நிலையில், கடலுக்குச் சென்ற மூன்று மீனவா்களும் படகின் இயந்திரத்தில் ஏற்பட்ட பழுது காரணமாக கடலில் திசைமாறிச் சென்று, சென்னை திருவொற்றியூா் அருகே பழவேற்காடு கடற்பகுதியில் தத்தளித்துள்ளனா். கடந்த 4 நாள்களுக்கு முன்பு அவா்களை அப்பகுதி மீனவா்கள் மீட்ட நிலையில், சென்னைக்கு செவ்வாய்க்கிழமை அழைத்துவந்து முதலுதவிக்காக மருத்துவமனையில் அனுமதித்துள்ளனா்.

மேலும், மருத்துவா்களின் ஆலோசனைக்குப் பிறகு அவா்கள் சொந்த ஊருக்குத் திரும்புவதற்கான நடவடிக்கைகள் மேற்கொள்ளப்படும் என்று மாவட்ட ஆட்சியா் தெரிவித்துள்ளாா்.

உறவினா்கள் போராட்டம்: மாயமான மீனவா்களை மீட்டுத் தரக் கோரி, அவா்களின் உறவினா்கள் கடலூா் மாவட்ட ஆட்சியரகத்தில் ஆட்சியா் சிபி ஆதித்யா செந்தில்குமாரை சந்தித்து திங்கள்கிழமை மனு அளித்திருந்தனா். இந்த நிலையில், மீனவா்களின் குடும்பத்தினா், உறவினா்கள் மற்றும் அப்பகுதி மீனவா்கள் 100-க்கும் மேற்பட்டோா் மீண்டும் மாவட்ட ஆட்சியரைச் சந்திக்க செவ்வாய்க்கிழமை ஆட்சியா் அலுவலகத்துக்கு வந்தனா். அங்கு பாதுகாப்புப் பணியில் இருந்த போலீஸாா் அவா்களைத் தடுத்து நிறுத்தி உள்ளே அனுமதிக்க மறுத்தனா்.

இதையடுத்து, அவா்கள் ஆட்சியா் அலுவலக நுழைவுவாயிலை முற்றுகையிட்டு போராட்டத்தில் ஈடுபட்டனா். பின்னா், போலீஸாா் பேச்சுவாா்த்தை நடத்தி, மாயமான மீனவா்களின் குடும்பத்தினரை மட்டும் உள்ளே செல்ல அனுமதித்தனா். அப்போது, மாயமான மீனவா் ஸ்ரீகாந்தின் தாய் திடீரென மயங்கி விழுந்தாா். உடனடியாக அங்கிருந்த போலீஸாரும், பொதுமக்களும் அவருக்கு முதலுதவி அளித்தனா். பின்னா், அவா் சுயநினைவுக்கு திரும்பினாா். தொடா்ந்து, மாயமான மீனவா்களின் குடும்பத்தினா் மாவட்ட ஆட்சியரைச் சந்தித்து கோரிக்கை விடுத்தனா்.