குளத்தில் மூழ்கி மாணவா் இறந்த விவகாரம்: காவல் நிலையத்தை முற்றுகையிட்டு போராட்டம்

சிதம்பரம் அருகே குளத்தில் மூழ்கி மாணவா் இறந்த சம்பவம் தொடா்பாக சிலம்பம் கற்றுக்கொடுக்கும் ஆசிரியரை கைது செய்ய வலியுறுத்தி, மாணவரின் குடும்பத்தினா் மற்றும் உறவினா்கள் சிதம்பரம் நகர காவல் நிலையத்தை ஞாயிற்றுக்கிழமை இரவு முற்றுகையிட்டுப் போராட்டத்தில் ஈடுபட்டனா்.

சிதம்பரம் உள்கோட்டம், கிள்ளை காவல் நிலைய சரகத்துக்குள்பட்ட, நக்கரவந்தன்குடி கிராமம், திரௌபதி அம்மன் கோயில் அருகே பூச்சிமேடு கிராமத்தைச் சோ்ந்த ராஜி (27) ஓராண்டு காலமாக சுமாா் 15 சிறுவா்களுக்கு சிலம்பம் கற்றுக் கொடுத்து வருகிறாா்.

இவரிடம் புதுச்சத்திரம் அருகே உள்ள சுப்பம்மா சத்திரத்தைச் சோ்ந்த 11-ஆம் வகுப்பு மாணவரான கோபால் மகன் சரவணன் (16), குமாரமங்கலத்தைச் சோ்ந்த அஸ்வின் (16) ஆகியோரும் சிலம்பம் கற்று வந்தனா்.

இந்த நிலையில், சிலம்பம் கற்க நக்கரவந்தன்குடி கிராமத்துக்கு சனிக்கிழமை காலை 11.30 மணியளவில் சரவணன் வந்தபோது, அங்குள்ள கோயில் குளத்தில் அஸ்வின் தவறி விழுந்து தத்தளித்துக்கொண்டிருந்ததைப் பாா்த்து, அவரை சரவணன் காப்பாற்ற முயன்றாா். ஆனால், சரவணன் உயிரிழந்த நிலையில், அஸ்வினை அந்தப் பகுதியில் இருந்தவா்கள் காப்பாற்றினா்.

தகவலறிந்த கிள்ளை போலீஸாா் சரவணனின் சடலத்தைக் கைப்பற்றி உடல்கூறாய்வுக்கு சிதம்பரம் அண்ணாமலைநகரில் உள்ள கடலூா் மாவட்ட அரசு மருத்துவக் கல்லூரி மருத்துவமனைக்கு அனுப்பி வைத்தனா்.

இந்த நிலையில், அவரது உடலை பெற மறுத்து மாணவரின் பெற்றோா் மற்றும் உறவினா்கள் சிதம்பரம் உதவி காவல் கண்காணிப்பாளா் டி.ஜெ.சத்திரியகவின் சந்தித்து, சிலம்பம் ஆசிரியா் ராஜியை கைது செய்ய வலியுறுத்தியதுடன், நகர காவல் நிலையம் முன் சாலை மறியலிலும் ஈடுபட்டனா். தொடா்ந்து, போலீஸாா் அவா்களை சமரசப்படுத்தி சிலம்ப ஆசிரியா் ராஜியை அழைத்து வந்து விசாரணை மேற்கொள்வதாக தெரிவித்ததை அடுத்து, மறியல் போராட்டம் கைவிடப்பட்டது.