கத்திக் குத்து:ஆட்டோ ஓட்டுநா் உயிரிழப்பு

கடலூா் மாவட்டம், பண்ருட்டியில் கத்திக் குத்தில் காயம் அடைந்து மருத்துவமனையில் சிகிச்சை பெற்று வந்த ஆட்டோ ஓட்டுநா் வியாழக்கிழமை உயிரிழந்தாா்.

பண்ருட்டி வட்டம், கே.குச்சிப்பாளையம் கிராமத்தில் வசித்து வந்தவா் நந்தகோபாலகிருஷ்ணன்(44). பண்ருட்டி அடுத்த திருவதிகை பகுதியைச் சோ்ந்தவா் பிரபு(43). இவா்கள், இருவரும் ஆட்டோ ஓட்டும் தொழிலாளா்கள். கடந்த 6 மாதங்களுக்கு முன்னா் ஆட்டோ சவாரி தொடா்பாக இருவா்களுக்குள் முன்விரோதம் ஏற்பட்டதாம்.

கடந்த 13-ஆம் தேதி பண்ருட்டி நான்கு முனை சந்திப்பு பகுதியில் இருவரும் கைகலப்பில் ஈடுபட்டுள்ளனா். அன்று இரவு 10 மணி அளவில் பண்ருட்டி பேருந்து நிலையம் காமராஜா் சிலை அருகே மீண்டும்தகராறுஏற்பட்டது. அப்போது, நந்தகோபாலகிருஷ்ணன் கையில் அணிந்திருந்த காப்பால், பிரபு தலையில் தாக்கினாா். இதில், காயமடைந்த பிரபு, தான் மறைத்து வைத்திருந்த கத்தியை எடுத்து நந்தகோபாலகிருஷ்ணனின் தொப்புள் பகுதியில் குத்தினாா். இதில், கத்தி உடைந்து வயிற்றில் சிக்கிக் கொண்டது. இந்த சம்பவத்தில் காயமடைந்த இருவரும் சிகிச்சை பெற பண்ருட்டி அரசு மருத்துவமனைக்குச் சென்றனா். அங்கு மருத்துவா்கள் நந்தகோபாலகிருஷ்ணனுக்கு முதலுதவி சிகிச்சை அளித்து மேல்சிகிச்சைக்காக முண்டியம்பாக்கம் அரசு மருத்துவக் கல்லூரி மருத்துவமனைக்கு அனுப்பி வைத்தனா்.

இந்த சம்பவம் தொடா்பாக நந்தகோபாலகிருஷ்ணன் மனைவி சந்தியா காவல் நிலையத்தில் புகாா் அளித்தாா். அதன் பேரில் , பண்ருட்டி போலீஸாா் வழக்குப்பதிவு செய்து பிரபுவை அக்.14-ஆம் தேதி கைது செய்து சிறையில் அடைத்தனா்.

இந்நிலையில் முண்டியம்பாக்கம் அரசு மருத்துவக் கல்லூரி மருத்துவமனையில் சிகிச்சை பெற்று வந்த நந்தகோபாலகிருஷ்ணன் வியாழக்கிழமை உயிரிழந்தாா். இந்த சம்பவம் குறித்து பண்ருட்டி போலீஸாா் விசாரித்து வருகின்றனா்.