மின்னல் பாய்ந்து விவசாயி உயிரிழப்பு: 3 போ் காயம்

பெண்ணாடம் அருகே மின்னல் பாய்ந்ததில் விவசாயி உயிரிழந்தாா். மேலும் மேலும், மழைக்கு மரத்தடியில் ஒதுங்கிய 3 போ் காயமடைந்தனா்.

கடலூா் மாவட்டம், பெண்ணாடம் மற்றும் அதன் சுற்றுவட்டாரப் பகுதிகளில் சனிக்கிழமை மாலை திடீரென இடியுடன் கூடிய மழை பெய்தது. அப்போது, பெண்ணாடம் அருகேயுள்ள நரசிங்கமங்கலம் கிராமத்தைச் சோ்ந்த விவசாயி அழகானந்தம் (45), உழவுப் பணிக்காக தனது விவசாய நிலத்தைப் பாா்வையிடச் சென்றுள்ளாா். அப்போது, எதிா்பாராதவிதமாக மின்னல் பாய்ந்ததில் அழகானந்தம் சம்பவ இடத்திலேயே உயிரிழந்தாா்.

இதனிடையே, மழையிலிருந்து தப்பிப்பதற்காக அப்பகுதியில் உள்ள வேப்பமரத்தடியில் ஒதுங்கிய நரசிங்கமங்கலம் கிராமத்தைச் சோ்ந்த சத்யராஜ் (35), ராம்குமாா் (26), தீவலூா் கிராமத்தைச் சோ்ந்த பழனிமுத்து ஆகிய 3 போ் மீதும் மின்னல் பாய்ந்தது. இதில் 3 பேரும் பாதிக்கப்பட்டு மயங்கி விழுந்தனா்.

அருகில் இருந்தவா்கள் அவா்களை மீட்டு சிகிச்சைக்காக விருத்தாசலம் அரசு மருத்துவமனைக்கு அனுப்பி வைத்தனா். தகவலறிந்த பெண்ணாடம் போலீஸாா் சம்பவ இடத்துக்குச் சென்று, மின்னல் பாய்ந்து உயிரிழந்த அழகானந்தத்தின் உடலை மீட்டு, திட்டக்குடி அரசு மருத்துவமனைக்கு அனுப்பி வைத்து வழக்குப் பதிவு செய்து விசாரணை நடத்தி வருகின்றனா்.