மின்னல் பாய்ந்து விவசாயி உயிரிழப்பு

கடலூா் மாவட்டம், பண்ருட்டி, நெய்வேலி மற்றும் குறிஞ்சிப்பாடி பகுதிகளில் திங்கள்கிழமை மாலை பரவலான மழை பெய்தது. மழையின் போது மின்னல் பாய்ந்து விவசாயக்கூலி ஒருவா் உயிரிழந்தாா்.

கடலூா் மாவட்டத்தில் கடந்த சில தினங்களாக அங்காங்கே ஒரு சில இடங்களில் மழை பெய்து வருகிறது. இந்நிலையில், பண்ருட்டியில் திங்கள்கிழமை மாலை பலத்த இடி மின்னலுடன் சுமாா் ஒரு மணி நேரம் கனமழை பெய்தது. இதனால், சாலைகளில் மழைநீா் பெருக்கெடுத்து ஓடியது. தாழ்வானப் பகுதிகளில் மழைநீா் தேங்கி நின்றன.

பண்ருட்டி வட்டம், திராசு கிராமத்தைச் சோ்ந்த குப்பன்(55) விவசாயக்கூலி. இவா், தனது தோட்டத்தில் கட்டி இருந்த மாட்டினை பிடிக்க சென்றபோது மின்னல் பாய்ந்து உயிரிழந்தாா். இது குறித்து பண்ருட்டி போலீஸாா் விசாரணை நடத்தி வருகின்றனா்.