தமிழை மொழிப்பாடமாகத் தேர்வு செய்த மாணவர்களை அங்கீகரிக்கக் கோரிக்கை

: புதுச்சேரியில் பிளஸ் 2 தேர்வில், தமிழை மொழிப்பாடமாக எடுத்து முதல் 3 இடங்களைப் பிடித்த மாணவர்களை அங்கீகரிக்க வேண்டுமென்று புதுச்சேரி இலக்கியப் பொழில் இலக்கிய மன்றம் வலியுறுத்தியுள்ளது.

 இது தொடர்பாக அதன் நிறுவனர் பெ.பராங்குசம் வெளிட்ட அறிக்கை:

 தமிழகத்தில் பிளஸ் 2 தேர்வில் தமிழை மொழிப்பாடமாக எடுத்துப் படித்து, மாநில அளவில் முதல் 3 இடங்களைப் பிடித்த மாணவர்கள் பட்டியலையே அந்த அரசு வெளியிடுகிறது. இவர்களைவிட, பிறமொழிப்பாடம் மூலம் அதிக மதிப்பெண் பெற்றிருந்தும், மாநில அளவில் அங்கீகாரம் கிடைக்கவில்லை.

 ஆனால் புதுச்சேரி அரசு, தமிழ் அல்லாத பிறமொழிப் பாடம் எடுத்துப் படித்தவர்களையே, முதல் 3 இடங்களில் அறிவிக்கிறது. தமிழைத் தேர்ந்தெடுத்துப் படித்த மாணவர்களைப் புறந்தள்ளியிருக்கிறது.

 புதுச்சேரி தவிர்த்து, பிற மாநிலங்களில் அந்தந்த மாநில மொழியே பிரதானமாக, கட்டாயமாகக் கற்பிக்கப்படுகிறது. இனி வரும் ஆண்டுகளில் பிளஸ் 2 தேர்வில் தமிழை மொழிப்பாடமாகத் தேர்வு செய்தோரையே அங்கீகரிக்க வேண்டும் என அறிக்கையில் குறிப்பிடப்பட்டுள்ளது.