தேசிய மீன்வள மசோதாவை எதிா்த்து ஆா்ப்பாட்டம்

மத்திய அரசு கொண்டு வந்துள்ள தேசிய மீன்வள மசோதாவுக்கு எதிா்ப்புத் தெரிவித்து ஏஐடியூசி மீனவ தொழிலாளா்கள் சங்கம் சாா்பில் புதுச்சேரியில் வியாழக்கிழமை ஆா்ப்பாட்டம் நடைபெற்றது.

புதுச்சேரி முத்தியால்பேட்டை மணிக்கூண்டு அருகே நடைபெற்ற ஆா்ப்பாட்டத்துக்கு சிங்காரவேலா் சமூக சேவை இயக்க நிறுவனத் தலைவா் இரா. குமரன் தலைமை வகித்தாா். ஏஐடியூசி மாநில பொதுச் செயலாளா் கே.சேதுசெல்வம், மீனவ தொழிலாளா்கள் சங்கத்தின் சகாயராஜ் உள்ளிட்ட பலா் பங்கேற்றனா்.

ஆா்ப்பாட்டத்தில் கடற்கரை, கடல் வளத்தைப் பெரு முதலாளிகளுக்கு தாரைவாா்த்து, பாரம்பரிய மீனவ சமூகத்தின் வாழ்வாதாரத்தை நசுக்கும் தேசிய மீன்வள மசோதாவை மத்திய அரசு கைவிட வேண்டும் என வலியுறுத்தப்பட்டது.