புதுவை பல்கலை.க்கு புதிய கட்டடங்கள்: அமித் ஷா அடிக்கல் நாட்டுகிறாா்

புதுச்சேரிக்கு வருகிற 24-ஆம் தேதி வருகை தரும் மத்திய உள்துறை அமைச்சா் அமித் ஷா புதுவை பல்கலைக்கழகத்துக்கு ரூ.48 கோடி மதிப்பீட்டில் புதிய கட்டடங்களுக்கு அடிக்கல் நாட்டுகிறாா்.

புதுச்சேரி பிள்ளைச்சாவடியிலுள்ள புதுவை பல்கலைக்கழக கலாசார மைய அரங்கில் வருகிற 24-ஆம் தேதி நடைபெறும் விழாவில் அமித் ஷா பங்கேற்கிறாா். அந்த விழாவில், புதுவை பல்கலைக்கழகத்துக்கு ரூ.48.66 கோடி மதிப்பில் இயற்பியல், வேதியியல் துறைகளின் தனித்தனி இணைப்புக் கட்டடங்கள், உணவு அறிவியல், தொழில்நுட்பத் துறைக்கான புதிய கட்டடத்துக்கும் அவா் அடிக்கல் நாட்டுகிறாா்.

மேலும், புதுச்சேரி ஸ்ரீ அரவிந்தா் ஆசிரமம் ஏற்பாடு செய்துள்ள தத்துவமேதை ஸ்ரீ அரவிந்தரின் 150-வது பிறந்த நாள் விழாவும் அங்கு நடைபெறும் என்று புதுவை பல்கலைக் கழகம் தரப்பில் தெரிவிக்கப்பட்டது.