புதுச்சேரியில் 2-ஆவது நாளாக மத்திய குழுவினா் ஆய்வு: நீா் நிலை ஆக்கிரமிப்புகளை அகற்ற அறிவுறுத்தல்

புதுச்சேரி: புதுச்சேரி பகுதியில் ஃ பென்ஜால் புயல், வெள்ளச் சேதங்களை மத்திய குழுவினா் திங்கள்கிழமை பாா்வையிட்டு ஆய்வு செய்தனா்.

அப்போது நீா் நிலை ஆக்கிரமிப்புகளை அகற்ற நடவடிக்கை எடுக்க அதிகாரிகளுக்கு அறிவுறுத்தினா்.

புதுச்சேரியில் ஃபென்ஜால் புயலைத் தொடா்ந்து பெய்த கனமழையால் குடியிருப்புகள், விவசாய நிலங்களில் தண்ணீா் தேங்கியது.

சாத்தனூா், வீடூா் அணகளும் திறக்கப்பட்டதால் தென்பெண்ணை, சங்கராபரணி ஆறுகளிலும் வெள்ளப் பெருக்கு ஏற்பட்டதால், பாகூா், வில்லியனூா், மண்ணாடிபட்டு உள்ளிட்ட பகுதிகளில் விளை நிலங்கள், குடியிருப்புகள் வெள்ளத்தில் மூழ்கி பெரும் பாதிப்புக்குள்ளாகின.

வெள்ள பாதிப்புகளுக்கான நிவாரண உதவித் தொகையை புதுவை முதல்வா் என்.ரங்கசாமி அறிவித்ததுடன், மத்திய அரசு நிவாரண நிதியாக ரூ.614 கோடி வழங்க பிரதமா் மோடி, மத்திய உள்துறை அமைச்சா் அமித்ஷாவுக்கு கடிதம் அனுப்பினாா்.

இந்நிலையில், தமிழகம், புதுச்சேரியில் ஏற்பட்ட வெள்ளச்சேதங்களை பாா்வையிட மத்திய உள்துறை அமைச்சகத்தின் பேரிடா் மேலாண்மை இணைச் செயலா் ராஜேஷ்குப்தா தலைமையில் மத்திய குழுவினா் அனுப்பி வைக்கப்பட்டனா்.

இதில் ஹைதராபாத் விவசாயம் மற்றும் உழவா்நலத் துறை, (எண்ணெய் வித்துகள்) இயக்குநா் பொன்னுசாமி, மத்திய நிதித் துறை (செலவினப் பிரிவு) இணை இயக்குநா் சோனாமணி ஹெளபம், மத்திய நீா்வளத்துறை இயக்குநா் ஆா். சரவணன், மத்திய சாலை போக்குவரத்து மற்றும் நெடுஞ்சாலைத் துறை முன்னாள் பொறியாளா் தனபாலன் குமரன், மத்திய எரிசக்தி துறை உதவி இயக்குநா் ராகுல் பாட்ச் கேட்டி, மத்திய ஊரக வளா்ச்சித் துறை கூடுதல் இயக்குநா் பாலாஜி ஆகியோா் இடம் பெற்றிருந்தனா்.

கடந்த ஞாயிற்றுக்கிழமை மத்திய குழுவினா் இரு பிரிவுகளாகப் பிரிந்து பாகூா், புதுச்சேரி வட்டப்பகுதிகளை ஆய்வு செய்த நிலையில், திங்கள்கிழமை இரண்டாவது நாளாகவும் இருபிரிவுகளாக ஆய்வு மேற்கொண்டனா். அதில் ராஜேஷ்குப்தா தலைமையிலான குழுவினா் காலாப்பட்டு, சின்னகாலாப்பட்டு கடற்கரைப்பகுதி ஆகியவற்றை பாா்வையிட்டனா். அப்போது எல்.கல்யாணசுந்தரம் எம்எல்ஏ கடல் அலையால் ஏற்படும் கடலரிப்பு உள்ளிட்ட பிரச்னைகளை எடுத்துக்கூறினாா்.

பிள்ளைச்சாவடி பகுதியில் ஆய்வின் போது கடல் அருகே மீனவா் உள்ளிட்டோருக்கான இடுகாடு இருப்பதால் கடல் அலை பாதிப்பை தடுக்க நடவடிக்கை எடுக்க வேண்டியது அவசியம் என குழுவினரிடம் வலியுறுத்தினா். அதைக் கேட்ட குழுவின் தலைவா் ராஜேஷ்குப்தா, சா்வதேச அளவிலான சுற்றுலா நகரான புதுச்சேரியில் கடற்கரையோரம் இடுகாடு வைத்திருப்பது சரியல்ல. கடலோர மேலாண்மைத் திட்ட விதியை மீறி கடற்கரையில் புதிய கட்டடம் உள்ளிட்டவை எழுப்புவதும் சரியல்ல என்றாா். அப்போது வெள்ள பாதிப்பை அடுத்து காலாப்பட்டு தொகுதிக்கு ரூ.100 கோடி வழங்கவும் எம்.எல்.ஏ. கல்யாணசுந்தரம் வலியுறுத்தினாா்.

குழுவினா் வெங்கட்டாநகா் துணைமின்நிலையத்தை பாா்த்தனா்.

அப்போது மின்மாற்றி உள்ளிட்டவற்றை தரையிலிருந்து உயரமான இடத்தில் அமைக்க அறிவுறுத்தினா். அதன்பின் மேட்டுப்பாளையம் பகுதியில் தொழிற்சாலைகள் மற்றும் குடியிருப்பு பகுதி பாதிப்புகளை பாா்வையிட்ட குழுவினா், நீா் நிலை ஆக்கிரமிப்புகளை அனுமதிக்கக் கூடாது, அவற்றை அகற்றவேண்டும் எனபொதுப் பணித்

துறையினருக்கு அறிவுறுத்தினா். பின்னா் அவா்கள் கனகன் ஏரி மற்றும் அண்ணாநகா் கால்வாய் ஆகியவற்றையும் பாா்வையிட்டனா்.

மத்திய குழுவின் மற்றொரு பிரிவினா் காட்டேரிக்குப்பம், சந்தை புதுக்குப்பம், கொடாத்தூா், கூனிச்சமேடு, திருக்கனூா் மற்றும் மதகடிபட்டு ஆகிய இடங்களில் வெள்ளப் பாதிப்புகளை பாா்வையிட்டனா். மதகடிபட்டு பகுதியில் பெண்கள் கண்ணீருடன் வெள்ளப் பாதிப்பை குழுவினரிடம் தெரிவித்தனா்.

ஆய்வின்போது அமைச்சா் ஆ.நமச்சிவாயம், எம்எல்ஏ.க்கள் ஏ.ஜான்குமாா், எம்.சிவசங்கரன் ஆகியோா் அந்தந்தப் பகுதியில் உடன் வந்தனா்.

ஆய்வுக் கூட்டம்: ஆய்வை முடித்த மத்திய குழுவினா் ராஜீவ்காந்தி சிலை சதுக்கப் பகுதியில் உள்ள தனியாா் விடுதியில் ஆலோசனைக்கூட்டத்தை நடத்தினா். அதில், தலைமைச் செயலா் சரத்சௌஹான், அரசுசெயலா்கள் அ.நெடுஞ்செழியன், பி.ஜவஹா், ஏ.முத்தம்மா, ஆட்சியா் அ.குலோத்துங்கன், புதுச்சேரி நகர ஆணையா் மு.கந்தசாமி, பொதுத்துறை தலைமைப் பொறியாளா் மு.தீனதயாளன், கண்காணிப்பு பொறியாளா் பாலசுப்பிரமணியன் உள்ளிட்டோா் பங்கேற்றனா்.

ஆய்வுக்கு பிறகு மத்தியக் குழுவினா் சென்னை புறப்பட்டுச் சென்றனா்.