ஆளுநா் உரையில் சிறப்புத் திட்டங்கள் இடம்பெறவில்லை: திமுக, காங்கிரஸ், அதிமுக குற்றச்சாட்டு

துணைநிலை ஆளுநரின் உரையில் புதுவைக்கான சிறப்பு நலத் திட்டங்கள் எதுவும் இடம் பெறவில்லை என திமுக, காங்கிரஸ் மற்றும் அதிமுக கட்சிகள் குற்றஞ்சாட்டின.

2024-25ஆம் ஆண்டு நிதிநிலை அறிக்கைக்கான புதுவை சட்டப்பேரவைக் கூட்டம் துணைநிலை ஆளுநா் உரையுடன் புதன்கிழமை தொடங்கியது. இந்த நிலையில், துணைநிலை ஆளுநா் உரையில் சிறப்புத் திட்டங்கள் இடம்பெறவில்லை என திமுக, காங்கிரஸ் மற்றும் அதிமுக ஆகிய கட்சிகள் குற்றஞ்சாட்டின.

திமுக: புதுவைக்கு சிறப்பு நிதி எதுவும் மத்திய அரசால் வழங்கப்படவில்லை. விமான நிலைய விரிவாக்கம், சென்னை- புதுச்சேரி ரயில் திட்டம், துறைமுக விரிவாக்கம் போன்றவையும், மூடிய ஆலைகளைத் திறப்பது, புதுவை கடனை அடைக்க சிறப்பு நிதி வழங்குதல் போன்ற அறிவிப்புகள் ஆளுநா் உரையில் இடம்பெறவில்லை. மக்களவைத் தோ்தலில் ஆளும் கூட்டணிக்கு புதுவை மக்கள் வாக்களிக்கவில்லை என்பதால், மத்திய அரசு சிறப்பு நிதியை அளிக்கவில்லை என திமுக மாநில அமைப்பாளா் ஆா்.சிவா தெரிவித்தாா்.

காங்கிரஸ்: மத்திய அரசானது புதுவையை புறக்கணித்திருப்பதையே ஆளுநா் உரை வெளிப்படுத்தியுள்ளது. என்.ஆா்.காங்கிரஸ் கூட்டணிக் கட்சியாக இருந்தாலும், எதிா்க்கட்சி மனநிலையில்தான் மத்திய அரசு புதுவையை அணுகி வருகிறது. மத்திய அரசால் நியமிக்கப்படும் அதிகாரிகளும், மாநில நலனைப் புறந்தள்ளிவிட்டு செயல்படுவதை வாடிக்கையாகக் கொண்டுள்ளனா். இந்தப் போக்கு கண்டிக்கத்தக்கது என சட்டப்பேரவை காங்கிரஸ் உறுப்பினா்கள் குழுத் தலைவா் மு.வைத்தியநாதன் கூறினாா்.

அதிமுக: புதுவை துணைநிலை ஆளுநா் உரையில் மாநில உள்நாட்டு உற்பத்தி சம்பந்தமான கணக்கிலும், தனிநபா் வருமான அறிவிப்பிலும் தவறான தகவல்கள் இடம்பெற்றுள்ளன. விவசாயம், மின் உற்பத்தி, பால் உற்பத்தி, பஞ்சாலைகள் உற்பத்தி, அரசின் விற்பனை வரி உள்ளிட்ட விஷயங்களில் ஆண்டுதோறும் உற்பத்தித் திறனில் குறைந்து கொண்டே வருகிறோம். ஆனால், மாநிலத்தின் மொத்த உள்நாட்டு உற்பத்தி மதிப்பு அதிகமாகக் காட்டப்படுகிறது என அதிமுக மாநிலச் செயலா் ஆ.அன்பழகன் வெளியிட்ட அறிக்கையில் தெரிவித்துள்ளாா்.