வாக்குச்சாவடி அலுவலா்களுக்கு இடையூறு செய்தால் 3 மாதம் சிறை: புதுச்சேரி ஆட்சியா் எச்சரிக்கை

வாக்குச்சாவடி நிலை அலுவலா்களுக்கு இடையூறு விளைவித்தால் 3 மாதம் சிறை தண்டனை விதிக்கப்படும் என்று புதுச்சேரி மாவட்ட ஆட்சியரும் மாவட்ட தோ்தல் அதிகாரியுமானஅ. குலோத்துங்கன் எச்சரிக்கை விடுத்துள்ளாா்.

இது குறித்து அவா் புதன்கிழமை வெளியிட்ட செய்திக் குறிப்பில் கூறியிருப்பதாவது:

இந்திய தோ்தல் ஆணையத்தின் வழிகாட்டுதலுக்கிணங்க புதுச்சேரி யூனியன் பிரதேசத்தில் கடந்த மாதம் 28- ஆம் தேதி முதல் 2026 பிப்ரவரி 7 ஆம் தேதி வரை வாக்காளா் சிறப்புத் தீவிர திருத்தப் பணி நடைபெறுகிறது.

அதன் ஒரு பகுதியாக கடந்த 4 ஆம் தேதி முதல் வாக்குச்சாவடி நிலை அலுவலா்கள் ஒவ்வொரு வீடாகச் சென்று கணக்கெடுப்புப் படிவங்களை வாக்காளா்களுக்கு விநியோகம் செய்து வருகின்றனா். இதுவரை புதுச்சேரி மாவட்டத்தில் மட்டும் 92 சதவீத வாக்காளா்களுக்குக் கணக்கெடுப்பு படிவங்கள் வழங்கப்பட்டுள்ளன.

விடுபட்ட வாக்காளா்களுக்கு படிவங்கள் வழங்கும் பணி தொடா்ந்து நடைபெற்று வருகிறது. வாக்குச்சாவடி நிலை அலுவலா்களாக நியமிக்கப்பட்டுள்ளவா்கள் அனைவரும் புதுச்சேரி அரசின் பல்வேறு துறைகளை சோ்ந்த ஊழியா்கள்.

அவா்கள் இரவு பகல் பாராமல் இந்தத் தோ்தல் பணியினை செய்து வருகின்றனா். இந்நிலையில், கடந்த சில நாட்களாக சில வாக்குச்சவடி நிலை அலுவலா்கள் தோ்தல் பணி செய்யும்போது களப்பணியில் பல்வேறு இடா்பாடுகளை சந்திக்க வேண்டியுள்ளதாக தெரிவித்துள்ளனா்.

எவரேனும், வாக்குச்சாவடி நிலை அலுவலா்களை அவா்களுடைய சட்டப்பூா்வமான பணிகளை மேற்கொள்ள விடாமல் தடுத்தால் அல்லது அவா்களுக்கு இடையூறு விளைவித்தால், ‘பாரதிய நியாய சன்ஹிதா, 2023 ’ சட்டத்தின் 221-ம் பிரிவின் படி மூன்று மாதங்களுக்கு மேற்படாத சிறைக்காவல் அல்லது ரூ.2500-க்கு உள்பட்ட அபராதம் அல்லது இரண்டும் தண்டனையாக விதிக்கப்படும்.

புதுச்சேரியில் பிழையில்லா வாக்காளா் பட்டியலைத் தயாரிப்பதற்கு பொதுமக்கள் மற்றும் தோ்தல் பணியாளா்களின் ஒருங்கிணைந்த பங்களிப்பு மிக அவசிய் என்பதால் அனைவரும் ஒத்துழைக்க வேண்டும் என்று கேட்டுக்கொண்டுள்ளாா்.