விழுப்புரம் மாவட்டத்தில் 40 ஆயிரம் மாணவர்களுக்கு இலவச பாடப் புத்தகங்கள் வழங்க ஏற்பாடு

விழுப்புரம் மாவட்டத்தில் ஒன்று முதல் 12-ஆம் வகுப்பு வரை உள்ள 40 ஆயிரம் அரசுப் பள்ளி மாணவ, மாணவிகளுக்கு இலவச பாடப் புத்தகங்கள் வழங்குவதற்கான ஏற்பாடுகள் நடைபெற்று வருகின்றன.
தமிழகத்தில் அரசு, அரசு உதவி பெறும் பள்ளிகளில் படித்து வரும் மாணவ, மாணவிகளுக்கு அரசு சார்பில், ஆண்டுதோறும் பாடப் புத்தகங்கள் இலவசமாக வழங்கப்பட்டு வருகின்றன. நிகழாண்டும் பாடப் புத்தகங்கள் வழங்க கல்வித் துறை தீவிர நடவடிக்கை மேற்கொண்டுள்ளது.
தமிழ்நாடு பாடநூல் மற்றும் கல்வியல் பணிகள் கழகம் பாடப் புத்தகங்களை தயார் செய்து அதனை அச்சிட்டு வழங்கி வருகிறது. புதிய கல்வித் திட்டங்களின் கீழ், கடந்தாண்டு 1, 6, 9, 11-ஆம் வகுப்புகளுக்கு புதிய பாடத் திட்டங்கள் அமைத்து, புதிய புத்தகங்கள் வழங்கப்பட்டன.
மீதமுள்ள வகுப்புகளுக்கு...: இதன் தொடர்ச்சியாக, நிகழாண்டு 2 முதல் 5-ஆம் வகுப்பு வரையும், 7, 8, 10, 12-ஆம் வகுப்புகளுக்கும் பாடத் திட்டங்கள் மாற்றம் செய்யப்பட்டு, புதிய புத்தகங்கள் வழங்கப்பட உள்ளன. இதற்கான புத்தகங்கள் சென்னை,  மதுரை, சிவகாசி உள்ளிட்ட பகுதிகளில் உள்ள அச்சகங்களில் அச்சிடப்பட்டு வந்துள்ளன. இந்தப் புத்தகங்களை வாங்கி பாடநூல் கழகத்தினர் மாவட்டங்கள்தோறும் கல்வித் துறைக்கு அனுப்பி வருகின்றனர். அந்த வகையில், விழுப்புரம் மாவட்டத்தில் உள்ள அரசு, அரசு உதவி பெறும் பள்ளிகளில் படித்து வரும் 40 ஆயிரம் மாணவ,  மாணவிகளுக்கு இலவச பாடப் புத்தகங்களை வழங்க நடவடிக்கை எடுத்துள்ளனர்.
விழுப்புரம் அரசு மகளிர் மேல்நிலைப் பள்ளி, காமராஜர் நகராட்சி மேல்நிலைப் பள்ளிகளில் இதற்கான பாடப் புத்தகங்கள் அண்மையில் வந்திறங்கின. புத்தகங்களை இந்தப் பள்ளிகளில் இருப்பு வைத்து, மாவட்டத்தில் உள்ள விழுப்புரம், உளுந்தூர்பேட்டை, திருக்கோவிலூர், செஞ்சி, திண்டிவனம், கள்ளக்குறிச்சி ஆகிய 6 கல்வி மாவட்டப் பகுதிகளுக்கு சனிக்கிழமை முதல் அனுப்பி வைக்கும் பணிகள் மும்முரமாக நடைபெற்று வருகிறது.
ஜூன் 3-இல் மாணவர்களுக்கு வழங்கப்படும்': இதுகுறித்து கல்வி அதிகாரிகள் கூறியதாவது: 
விழுப்புரம் மாவட்டத்தில் உள்ள 350 அரசு, அரசு உதவி பெறும் உயர்நிலை, மேல்நிலைப் பள்ளிகளுக்கும், 1,850 தொடக்க, நடுநிலைப் பள்ளிகளுக்கும் தேவையான இலவச பாடப் புத்தகங்களை பாடநூல் கழகத்திலிருந்து பெற்று தற்போது அனுப்பி வைத்து வருகிறோம்.
விழுப்புரத்திலிருந்து  6 கல்வி மாவட்ட அலுவலகங்களுக்கும் புத்தகங்கள் அனுப்பி வைக்கப்படுகின்றன. அவர்கள் அங்கே புத்தகங்களை இருப்பு வைத்து அந்தந்தப் பள்ளிகளுக்கு அனுப்பி வைக்க உள்னனர். 
இந்தப் பணிகள் ஜூன் 1-ஆம் தேதிக்குள் முடிக்கப்பட்டு, பள்ளிகள் திறக்கும் முதல் நாளில் (ஜூன் 3)  பாடப் புத்தகங்களை வழங்க தலைமை ஆசிரியர்கள் மூலம் அறிவுறுத்தி நடவடிக்கை எடுத்துள்ளோம் என்றனர்.
இதேபோல, தனியார் பள்ளிகளும் சென்னை பாடநூல் கழகத்திலிருந்து புத்தகங்களை விலைக்கு வழங்குகின்றனர். அதன்படி, விழுப்புரம் மாவட்ட தனியார் பள்ளிகளுக்கு அரசு கிடங்கிலிருந்து பாட புத்தகங்களை அனுப்பும் பணிகள் இரு தினங்களாக நடைபெற்று வருகின்றன.