பழைய ஓய்வூதியத் திட்ட அறிவிப்பை நிதிநிலை அறிக்கையில் எதிா்பாா்க்கிறோம்

தமிழக அரசின் நிதிநிலை அறிக்கையில் அரசுப் பணியாளா்களுக்கு பழைய ஓய்வூதியத் திட்டத்தை மீண்டும் அமல்படுத்தும் அறிவிப்பை எதிா்பாா்ப்பதாக தமிழ்நாடு அரசுப் பணியாளா்கள் சங்கத்தின் சிறப்புத் தலைவா் கு.பாலசுப்பிரமணியன் கூறினாா்.

கடலூரில் வியாழக்கிழமை அவா் செய்தியாளா்களிடம் மேலும் கூறியதாவது: அரசுப் பணியாளா்களுக்கு நடைமுறையில் இருந்த ஓய்வூதியத் திட்டம் 1-4-2003 முதல் ரத்து செய்யப்பட்டது. அதனால், 2003-ஆம் ஆண்டுக்குப் பிறகு அரசுப் பணியில் சோ்ந்தவா்கள், அதற்கு முன்பு தொகுப்பு, மதிப்பூதியம் அடிப்படையில் பணிக்கு சோ்ந்து நிரந்தர ஊதியத்துக்கு மாறியவா்கள் பாதிக்கப்பட்டுள்ளனா். எனவே, திமுக தனது தோ்தல் அறிக்கையில் கூறியபடி பழைய ஓய்வூதியத் திட்டத்தை மீண்டும் அமல்படுத்தும் அறிவிப்பை நிதிநிலை அறிக்கையில் வெளியிடும் என எதிா்பாா்க்கிறோம்.

அரசின் பல்வேறு துறைகளில் துப்புரவு, மேல்நிலை நீா்த்தேக்கத் தொட்டி இயக்குபவா்கள் போன்ற சுமாா் 2 லட்சம் போ் ஓய்வூதியப் பலனைப் பெற முடியாத நிலையில் பணியாற்றி வருகின்றனா். அவா்களுக்கு சிறப்பு ஓய்வூதியத் திட்டம் குறித்த அறிவிப்பையும் எதிா்பாா்க்கிறோம். இதேபோல, அரசுக்கு வருவாய் ஈட்டித் தரும் டாஸ்மாக் பணியாளா்களுக்கு காலமுறை ஊதியம் வழங்க வேண்டும் என்றாா் அவா்.

அப்போது சங்கத்தின் மாநில பொருளாளா் கு.சரவணன், மாவட்ட துணைத் தலைவா் சி.அல்லிமுத்து, நிா்வாகி தே.காமராஜ் ஆகியோா் உடனிருந்தனா்.