கிளியனூா் நேரடி நெல் கொள்முதல்நிலையத்தில் ஆட்சியா் ஆய்வு

விழுப்புரம் மாவட்டம், வானூா் அருகேயுள்ள கிளியனூரில் செயல்படும் நேரடி நெல் கொள்முதல் நிலையத்தை மாவட்ட ஆட்சியா் த.மோகன் வியாழக்கிழமை நேரில் பாா்வையிட்டு ஆய்வு செய்தாா்.

இந்த ஆய்வின்போது, நேரடி நெல் கொள்முதல் நிலையத்தில் எவ்வளவு நெல் மூட்டைகள் கொள்முதல் செய்யப்பட்டுள்ளன, நெல் மூட்டைகளை கொள்முதல் செய்வதில் எடையளவு சரியாக உள்ளதா எனவும், கொள்முதல் செய்யப்படும் நெல் ரகங்கள் எவ்வாறு தரம் பிரிக்கப்படுகின்றன எனவும், மேலும் கொள்முதல் செய்யப்பட்ட நெல்லுக்கு பணப் பட்டுவாடா முறையாக நடைபெறுகிறா என்றும் நெல் கொள்முதல் நிலைய அலுவலா்களிடம் கேட்டறிந்தாா்.

தொடா்ந்து, கொள்முதல் செய்யப்பட்ட நெல் மூட்டைகளை பாதுகாப்பாக வைக்கத் தேவையான இட வசதி, மின் வசதி மற்றும் நெல் மூட்டைகளை மழையில் நனையவிடாதபடி பாதுகாக்க தாா்ப்பாய் வசதி உள்ளதா என்பதையும் ஆய்வு செய்தாா்.

இதையடுத்து, கொள்முதல் செய்யப்பட்ட நெல் மூட்டைகளை உடனடியாக ஒழுங்குமுறை விற்பனைக் கூடத்துக்கு அனுப்பிவைக்க வேண்டும் என்றும், முதலில் வருவோருக்கு முன்னுரிமை என்ற அடிப்படையில் டோக்கன் முறையில் விவசாயிகளிடமிருந்து நெல் மூட்டைகளை கொள்முதல் செய்ய வேண்டும் என்றும் அலுவலா்களிடம் மாவட்ட ஆட்சியா் மோகன் அறிவுறுத்தினாா்.

அப்போது, வட்டாட்சியா் சங்கரலிங்கம், வட்டார வளா்ச்சி அலுவலா்கள் முருகன், ராமதாஸ் மற்றும் துறை சாா்ந்த அலுவலா்கள் உடனிருந்தனா்.

சமத்துவபுரத்தில்...: இதையடுத்து, வானூா் ஊராட்சி ஒன்றியம், கொழுவாரி ஊராட்சியில் அமைந்துள்ள பெரியாா் நினைவு சமத்துவபுரத்தில் ரூ.1.92 லட்சத்தில் 250 சதுரஅடிகொண்ட 100 வீடுகள் கட்டப்பட்டு வருவதையும், அங்கு நடைபெற்று வரும் தெரு விளக்குகள், சிமென்ட் சாலைகள் அமைத்தல் உள்ளிட்ட பணிகளையும் மாவட்ட ஆட்சியா் மோகன் ஆய்வு செய்தாா்.

அப்போது, மாவட்ட ஊரக வளா்ச்சி முகமைத் திட்ட இயக்குநா் பூ.காஞ்சனா, ஊரக வளா்ச்சித் துறை செயற்பொறியாளா் ராஜா, உதவி செயற்பொறியாளா் புவனேஸ்வரி, வட்டாட்சியா் சங்கரலிங்கம், வட்டார வளா்ச்சி அலுவலா்கள் முருகன், ராமதாஸ் உள்ளிட்டோா் உடனிருந்தனா்.