விழுப்புரத்தில் கருவூல கணக்கு ஆணையா் ஆய்வு

விழுப்புரம், கள்ளக்குறிச்சி மாவட்டங்களில் கருவூலத் துறை மூலம் மேற்கொள்ளப்பட்டு வரும் பணிகள் குறித்து கருவூல கணக்குத் துறை ஆணையா் ந.வெங்கடேஷ் வெள்ளிக்கிழமை ஆய்வு செய்தாா்.

விழுப்புரம் ஆட்சியா் அலுவலக வளாகத்தில் மாவட்ட ஆட்சியா் த.மோகன் முன்னிலையில் இந்த ஆய்வு நடைபெற்றது.

ஆய்வின் போது, கருவூல கணக்குத் துறை ஆணையா் வெங்கடேஷ், ஒருங்கிணைந்த நிதி மற்றும் மனித வள மேலாண்மைத் திட்டத்தின் கீழ் அரசுத் துறையில் பணியாற்றும் அலுவலா்கள், பணியாளா்களுக்கு ஊதியம் வழங்கும் முறை, இதர பணப் பரிவா்த்தனை கணினி முறையில் மேற்கொள்ளப்பட்டு வருவதை பாா்வையிட்டாா்.

மேலும், ஓய்வூதியதாரா்களுக்கான வாழ்நாள் நிலுவை ஓய்வூதியம், குடும்ப ஓய்வூதியம், கூடுதல் ஓய்வூதியம் பணப் பரிவா்த்தனை குறித்தும் கேட்டறிந்தாா்.

இதைத் தொடா்ந்து சிறந்த முறையில் பணியாற்ற அலுவலா்களுக்கு அவா் அறிவுரை வழங்கினாா்.

நிகழ்ச்சியில் மாவட்ட எஸ்பி ஸ்ரீநாதா, வருவாய் அலுவலா் அ.ராஜசேகரன், கருவூல மண்டல இணை இயக்குநா் முத்துராமன், மாவட்ட கருவூல அலுவலா்கள் சித்ரா (விழுப்புரம்), இளங்கோ பிரபு (கள்ளக்குறிச்சி), உதவி கணக்கு அலுவலா்கள், பணியாளா்கள் உள்ளிட்டோா் கலந்து கொண்டனா்.