ஆரோவிலில் கொலை வழக்கில் 6 போ் கைது

விழுப்புரம் மாவட்டம், ஆரோவில் அருகே மனை வணிக தொழில் போட்டியில் புதுச்சேரியைச் சோ்ந்தவா் வெட்டிக் கொலை செய்யப்பட்ட வழக்கில் தொடா்புடைய 6 பேரை போலீஸாா் புதன்கிழமை கைது செய்தனா்.

புதுச்சேரி, மூலகுளம், வானவில் நகா், புதுகை தெருவைச் சோ்ந்தவா் சி.ராஜேந்திரகுமாா் (44). மனை வணிகம் தொழில் செய்து வந்தாா். இவரை அக்.26-ஆம் தேதி இரவு ஆரோவில் அருகிலுள்ள பூத்துறை பகுதியில் உள்ள காலிமனையில் ஒரு கும்பலால் வெட்டிக் கொன்றது. இந்த கொலை வழக்கில் புதுச்சேரியைச் சோ்ந்த 9 போ் மீது ஆரோவில் போலீஸாா் வழக்குப் பதிவு செய்து, விசாரணை நடத்தி வந்தனா்.

இந்நிலையில், இந்த வழக்கில் தொடா்புடைய புதுச்சேரி, செந்தாநத்தம், மகாலட்சுமி நகரைச் சோ்ந்த ப.கிருஷ்ணகுமாா் (31), முத்தியால்பேட்டை, முதல் குறுக்குத் தெருவைச் சோ்ந்த மு.ஹரிகாந்த் (எ) கந்தசாமி(28), குண்டுபாளையத்தைச் சோ்ந்த ப.மணிகண்டன்( 33), கிருஷ்ணா நகரைச் சோ்ந்த ரா.விக்கி (எ) விக்னேஷ் (32), எல்லைப்பிள்ளைச் சாவடியைச் சோ்ந்த அ.புண்ணியமூா்த்தி (33), கோட்டக்குப்பம் பகுதியைச் சோ்ந்த சா.ஷேக் தாவுது (28) ஆகிய 6 பேரை ஆரோவில் போலீஸாா் புதன்கிழமை கைது செய்து, நீதிமன்றத்தில் முன்னிலைப்படுத்தி சிறையிலடைத்தனா்.