திருமணம் கைகூடும்

எனது தம்பிக்கு வயது 41 ஆகிறது. பள்ளியில் ஆய்வக உதவியாளராக பணிபுரிந்து வருகிறார். கடந்த பல வருடங்களாக அவருக்கு பெண் பார்த்து வருகிறோம். ஆனால் இதுவரை பொருத்தமான பெண் அமையவில்லை. எனது தம்பிக்கு திருமணம் எப்பொழுது நடைபெறும்? பரிகாரம் ஏதும் செய்ய வேண்டுமா? 

வாசகி, கோவில்பட்டி. 

உங்கள் சகோதரருக்கு மிதுன லக்னம், கடக ராசி, பூசம் நட்சத்திரம். லக்னாதிபதி மற்றும் சுக ஸ்தானாதிபதியான புத பகவான் தனம், வாக்கு, குடும்ப ஸ்தானத்தில் சூரிய, குரு, சந்திர பகவான்களுடன் இணைந்திருக்கிறார். இதனால் அமாவாசை யோகம், புத ஆதித்ய யோகம், சிவராஜயோகம், சந்திர பகவான் இரண்டாம் வீட்டில் ஆட்சி பெற்றிருப்பதால் தேனு யோகம் ஆகிய சிறப்பான யோகங்கள் உண்டாகின்றன. பூர்வ புண்ணியாதிபதி, அயன ஸ்தானாதிபதியான சுக்கிர பகவான் லக்னத்தில் அமர்ந்திருப்பதும் சிறப்பு. அஷ்டம பாக்கியாதிபதியான சனி பகவான் தைரிய ஸ்தானத்தில் ராகு பகவானுடன் இணைந்து அவர்கள் இருவரின் பார்வை பாக்கிய ஸ்தானத்தின் மீது படிகிறது. சுக்கிர பகவான் நேர் பார்வையாக களத்திர ஸ்தானத்தைப் பார்வை செய்கிறார். தற்சமயம் சுக்கிர பகவானின் தசையில் சூரிய புக்தி நடக்கிறது. அடுத்த ஆண்டு ஏப்ரல் மாதத்திற்குள் திருமணம் கைகூடும். பிரதி வியாழக்கிழமைகளில் குரு பகவானையும், தட்சிணாமூர்த்தியையும் வழிபட்டு வரவும். முடிந்தால் ஒருமுறை ஆலங்குடி சென்று வழிபட்டு வரவும்.