இயந்திரக் கோளாறு: லண்டன் விமானம் ரத்து

சென்னையில் இருந்து லண்டன் புறப்பட்ட விமானத்தில் திடீரென இயந்திர கோளாறு ஏற்பட்டது. இதையடுத்து அந்த விமானம் ரத்து செய்யப்பட்டது. அதில் செல்லவிருந்த பயணிகள் ஹோட்டலில் தங்கவைக்கப்பட்டனர்.

சென்னை விமான நிலையத்தில் இருந்து லண்டனுக்கு செவ்வாய்க்கிழமை அதிகாலை 5 மணிக்கு பிரிட்டிஷ் ஏர் லைன்ஸ் விமானம் செல்ல தயாராக இருந்தது. 265 பயணிகள் சோதனை முடித்து அதிகாலை 3 மணி முதல் விமானத்தில் அமர்ந்திருந்தனர். காலை 5 மணிக்கு விமானம் புறப்படத் தயாரானது. அதற்கு முன்பு விமானி இறுதிக்கட்ட சோதனை செய்தார். அப்போது விமான எஞ்ஜினில் கோளாறு இருப்பது கண்டுபிடிக்கப்பட்டது. இதையடுத்து பயணிகள் அனைவரும் நட்சத்திர ஹோட்டலில் தங்கவைக்கப்பட்டனர். அந்த விமானம் ரத்து செய்யப்பட்டதாக அறிவிக்கப்பட்டது.