ஷாருக் கான், கத்ரினா கயிஃப், அனுஷ்கா சர்மா நடிப்பில் உருவாகியுள்ள ஜீரோ படம் கடந்த 21-ம் தேதி வெளியானது. இப்படத்தின் இயக்குநர் ஆனந்த் எல். ராய் - தனு வெட்ஸ் மனு, தனு வெட்ஸ் மனு ரிடர்ன்ஸ், ரான்ஜானா ஆகிய படங்களை இயக்கியுள்ளார். இந்தப் படத்தில் 3 அடி உயரம் உள்ளவராக ஷாருக் கான் நடித்துள்ளார். வித்தியாசமான வேடத்தில் ஷாருக் கான் நடித்துள்ளதால் இந்தப் படத்துக்கு அதிக எதிர்பார்ப்பு இருந்தது.
ஆனால், படம் வெளியான நாள் முதல் எதிர்மறையான விமரிசனங்களே அதிகமாகக் கிடைத்துள்ளன. இதனால் இப்பட வசூலில் அதிகப் பாதிப்பு ஏற்பட்டுள்ளது. முதல் நாளன்று இந்தியாவில் ரூ. 20 கோடி கிடைத்தது. சனி, ஞாயிறு ஆகிய தினங்களில் ரூ. 18 கோடி, ரூ. 21 என முறையே கிடைத்துள்ளதால் இதன் வசூல் இதுவரை கிட்டத்தட்ட ரூ. 60 கோடிக்கும் குறைவாகவே உள்ளது. ஷாருக் கான் போன்ற ஒரு பெரிய நடிகருக்கு இந்த வசூல் மிகவும் குறைவாகும். இதனால் திரையரங்கு உரிமையாளர்கள் ஏமாற்றம் அடைந்துள்ளார்கள். எனினும் கிறிஸ்துமஸ் விடுமுறை காரணமாக இந்த வாரம் இதன் வசூல் அதிகமாக வாய்ப்புள்ளதா என்பது இனிமேல்தான் தெரிய வரும்.