பாரதி கண்ணம்மா, பொற்காலம், ஆட்டோகிராப், பாண்டவர் பூமி, தவமாய் தவமிருந்து உள்ளிட்ட தனது படைப்புகளால் தமிழ் ரசிகர்களின் வெகுவான ஆதரவைப் பெற்றவர் இயக்குநர் சேரன். சொந்த பிரச்னைகள் மற்றும் கடைசியாக இயக்கிய ஜே.கே எனும் நண்பனின் வாழ்க்கை படத்தில் ஏற்பட்ட வியாபார நஷ்டம் ஆகியவற்றால் சிறிது காலம் சினிமாவிலிருந்து விலகி இருந்தார். தற்போது மீண்டும் படம் இயக்க வந்துள்ளார்.
சுமார் 4 வருடங்களுக்குப் பின் சேரன் எழுதி இயக்கியுள்ள இந்தப் படத்தின் படப்பிடிப்பு முடிந்துள்ள நிலையில், படத்துக்கு திருமணம் என்று பெயர் சூட்டப்பட்டுள்ளது. உமாபதி, கவிதா சுரேஷ், தம்பி ராமையா, மனோபாலா, ஜெயப்பிரகாஷ், சுகன்யா, எம்.எஸ்.பாஸ்கர் உள்ளிட்டோர் நடிக்கின்றனர். இவர்களோடு சேரனும் முக்கிய கதாபாத்திரத்தில் நடிக்கிறார்.
சமீபத்தில் இப்படத்தின் டீசர் வெளியிடப்பட்டது. இதைப் பலரும் சமூகவலைத்தளங்களில் வழியாகப் பார்த்துள்ளார்கள். இதற்கு நன்றி தெரிவிக்கும்விதமாக சேரன் தெரிவித்துள்ளதாவது:
திருமணம் முன்னோட்டம் இதுவரை பார்த்தவர்கள் 6,50,000 பேர்... அத்தனை பேரும் தியேட்டர்ல படம் பாத்துட்டாலே முதலீடு பண்ண பணமும் லாபமும் தயாரிப்பாளருக்கு கிடைத்துவிடும் என்ற நம்பிக்கையை கொடுத்தது.. நன்றி மக்களே என்று கூறியுள்ளார்.