3 நாள்களில் ரூ. 100 கோடி வசூல்: பிகில் சாதனை!

ராஜா ராணி, தெறி, மெர்சல் ஆகிய படங்களை இயக்கியுள்ள பிரபல இயக்குநர் அட்லி அடுத்ததாக விஜய் கதாநாயகனாக நடித்துள்ள பிகில் படத்தை இயக்கியுள்ளார். மெர்சல் படத்துக்குப் பிறகு விஜய் - அட்லி - ஏ.ஆர். ரஹ்மான் இணையும் புதிய படம் குறித்த அதிகாரபூர்வ அறிவிப்பை ஏஜிஎஸ் நிறுவனம் கடந்த வருடம் இறுதியில் வெளியிட்டது. நயன்தாரா, ஜாக்கி ஷெராப், விவேக், யோகிபாபு, கதிர் போன்றோர் இப்படத்தில் நடித்துள்ளார்கள். இசை - ஏ.ஆர். ரஹ்மான், ஒளிப்பதிவு - ஜி.கே. விஷ்ணு, பாடல்கள் - விவேக், படத்தொகுப்பு - ரூபன் எல். ஆண்டனி, கலை - முத்துராஜ், சண்டைப் பயிற்சி - அனல் அரசு. ஜனவரி 19 அன்று பூஜை நடைபெற்றது. பிகில் படத்துக்கு தணிக்கையில் யு/ஏ சான்றிதழ் அளிக்கப்பட்டுள்ளது. படத்தின் கால அளவு 2 மணி நேரம் 58 நிமிடம் 59 நொடி. 

இந்நிலையில் கடந்த வெள்ளியன்று வெளியான பிகில் படம் முதல் 3 நாள்களில் உலகளவில் ரூ. 100 கோடி வசூலை எட்டியுள்ளதாகத் தகவல்கள் வெளியாகியுள்ளன. மேலும், மும்பையில் சமீபத்தில் வெளியான ஹிந்திப் படங்களை விடவும் பிகில் படம் அரங்கு நிறைந்த காட்சிகளாக ஓடிக்கொண்டிருக்கிறது. இதனால், இந்திய அளவில் கடந்த மூன்று நாள்களில் அதிக வசூலைக் கண்ட படம் என்கிற பெருமையும் பிகில் படத்துக்குக் கிடைத்துள்ளது.