நடிகை சித்ரா தற்கொலை: காவல்துறையில் தந்தை புகார்

சித்ராவில் உடல் காலை 7 மணிக்குக் கீழ்ப்பாக்கம் அரசு மருத்துவமனைக்குக் கொண்டு செல்லப்பட்டது. அங்கு அவரது உடலுக்குப் பிரேத பரிசோதனை நடைபெறுகிறது. பிறகு அவருடைய உடல் குடும்பத்தினரிடம் வழங்கப்படும். சித்ராவின் தந்தை காமராஜ், காவல் துறையில் உதவி ஆய்வாளராகப் பணியாற்றி ஓய்வு பெற்றவர்.

ஹேமந்த் மற்றும் சித்ராவின் குடும்பத்தினரிடம் நசரத்பேட்டை காவல்துறையினர் விசாரணை செய்து வருகிறார்கள். அதில், சித்ராவுக்கும் ஹேமந்துக்கும் இரு மாதங்களுக்கு முன்பே பதிவு திருமணம் நடைபெற்றதாக விசாரணையில் தெரிய வந்துள்ளது. அக்டோபர் 19 அன்று இருவரும் பதிவு திருமணம் செய்துகொண்டதால் தற்போது சித்ராவின் மரணம் குறித்து முகப்பேர் மேற்கு கோட்டாட்சியர் விசாரணை நடத்த உள்ளார். சித்ராவின் குடும்பத்தினரிடம் தற்கொலை குறித்து விரிவாக விசாரணை நடத்தி அவர் அறிக்கை தாக்கல் செய்வார்.

இந்நிலையில் நடிகை சித்ராவின் மரணத்துக்கான காரணத்தைக் கண்டுபிடிக்க வேண்டும் என்று அவருடைய தந்தை காமராஜ், நசரத்பேட்டை காவல்துறையில் புகார் அளித்துள்ளார். இதையடுத்து சித்ராவும் ஹேமந்தும் தங்கிய விடுதி ஊழியர்களிடமும் விசாரணை நடைபெற்று வருகிறது. விடுதியில் உள்ள சிசிடிவி காட்சிகளையும் ஆய்வு செய்ய காவலர்கள் முடிவெடுத்துள்ளார்கள்.